Առաջին անհրաժեշտության գրեթե բոլոր սննդամթերքները թանկացել են. Հայոց աշխարհ

Վերջին օրերին Երեւանի խանութներում ապրանքների գների նկատելի աճ է գրանցվում։

Ընդ որում՝ միանգամից թանկացել են առաջին անհրաժեշտության գրեթե բոլոր սննդամթերքները՝ շաքարավազը, սուրճը, թեյը, ձեթը, կարագը, յուղը, բրնձեղենը, մակարոնեղենը, ալյուրը: Գնաճից զերծ չեն մնացել նաեւ պահածոները, կոնֆետեղենը, նպարեղենը, գազավորված ըմպելիքները, հյութերը, խմիչքը: Թերեւս ավելի հեշտ է թվարկել այն սննդամթերքները, որոնք այս օրերին դեռ չեն թանկացել, քանի որ դրանք ավելի փոքրաթիվ են՝ երշիկեղենը, պանիրը, ձուն:

Թանկացած սննդամթերքի գինն ավելացել է 5-7 տոկոսով: Թեեւ որոշ ապրանքների դեպքում թանկացումներն ավելի զգալի են: Օրինակ, «Սարգիս Կարոլինա» ընկերությունը ալկոհոլային խմիչքները վաճառողին սկսել է տրամադրել ընդհուպ մինչեւ 600-700 դրամ թանկ գներով:
Թվում է, թե գնաճը դրամի արժեզրկման բնականոն հետեւանք է: Բայց եթե այդպես է, պետք է թանկանային միայն այն ապրանքները, որոնք ներկրված են կամ պատրաստվում են հիմնականում ներկրված հումքով: Երեւանի մի քանի խանութներով շրջելով՝ մենք արձանագրեցինք՝ ներմուծված ապրանքների կողքին գրեթե նույնքան թանկացել է նաեւ հայրենական արտադրության կամ հիմնականում տեղական հումքով պատրաստվող սննդամթերքը:
Երեկվանից բոլոր խանութները «Աշտարակ կաթ», «Բիոկաթ» ընկերությունների կաթնամթերքի ողջ տեսականին ստացել են 30-50 դրամ թանկ գներով: Դա այն դեպքում, երբ հենց այդ ընկերությունները կաթնամթերքի վրա արված մակնշումներում սպառողին հավատացնում են, թե իրենց արտադրանքն անարատ կաթից է, այլ ոչ թե ներկրվող կաթի փոշուց: Իսկ եթե անարատ ու տեղական կաթից է, ապա ինչո՞ւ են թանկացումներով արձագանքում դրամի արժեզրկմանը:
Անտարակույս կաթնամթերքի շուկայում որոշակի թելադրող դիրք ունեցող ընկերությունների կամայական քայլին շուտով կհետեւեն նաեւ կաթնամթերք արտադրող մնացած ընկերությունները, ինչպես լինում է նման դեպքերում:
Ի դեպ, խանութներից մեկում տեղեկացրին, որ առաջիկա երկու օրում իրենց թանկ գներով են մատակարարելու նաեւ միսը, հավը, որոնք նույնպես որեւէ առնչություն չունեն ներմուծված հումքի հետ:
Զարմանալի է, որ ներկրված ցորենի ալյուրով պատրաստվող հաց արտադրող ընկերությունները դեռեւս մտադրություն չունեն միանալու սպառողների վրա գնաճային հարձակում նախաձեռնած տնտեսավարողներին: Հաց արտադրող որեւէ ընկերություն, գոնե երեկվա դրությամբ, խանութի աշխատակիցներին հացի թանկացման մասին դեռ չէր զգուշացրել:

Մանրամասները՝ թերթի այսօրվա համարում: