Արցախի հստակ մեսիջը քաղաքակիրթ աշխարհին

Քաղաքական մեկնաբան Մենուա Հարությունյանն իր ֆեյսբուքյան էջում գրում է.

Արցախի դատարանը ադրբեջանցի դիվերսանտներին դատապարտեց ցմահ ազատազրկման, որը քաղաքական հստակ մեսիջ էր քաղաքակիրթ աշխարհին, որ Արցախը ժողովրդավարական պետություն է, միգուցե ավելի ժողովրդավարական, քան շատ և շատ ժողովրդավարության դրոշակը ծածանող պետություններ: Ի տարբերություն սուլթանական Ադրբեջանի՝ ովքեր պատահմամբ Ադրբեջանում հայտնված հայ գյուղացուն ծեծելով սպանում են, Արցախը դատական վճռով դատապարտում է ադրբեջանցի դիվերսանտներին: Հուսով եմ, Մինսկի խմբի համանախագահ երկրները և ժողովրդավարական աշխարհը կգնահատեն Արցախի ժողովրդի՝ ժողովրդավարական պետություն կառուցելու ջանքերը: Անցնող տարին լարված էր ղարաբաղա-ադրբեջանական սահմանում, բայց արցախցին նույնիսկ այդ պայմաններում ոչ միայն դժվարությամբ իր հացն է վաստակում, այլ կերտում է ժողովրդավարական մի պետություն:
Հ.Գ. Եթե իրապես ժողովրդավարությունը քաղաքակիրթ աշխարհի համար գաղափար է, այլ ոչ՝ գործիք, ապա վաղ թե ուշ նրանք ստիպված կլինեն իրենց ընտանիք ընդունել ժողովրդավարական Արցախը: