Արդարադատությունը պետք է իրականացնեն հայկական իրավապահ մարմինները. Սվանիձե. Ժամանակ

Ժամանակ» թերթի զրուցակիցն է ռուսական «Զեռկալո» ծրագրի հեռուստամեկնաբան, ՌԴ «Հանրային պալատի» անդամ, ռուսաստանցի հայտնի քաղաքագետ, հրապարակախոս Նիկոլայ Սվանիձեն: Ներկայացնում ենք հատված հարցազրույցից.

«Պրն Սվանիձե, գնահատեք, խնդրեմ, Գյումրիում տեղի ունեցած ոճիրն ու հուզումները:

Ես իրավիճակը գնահատում եմ բավականին ծանր, բայց լուծելի, որովհետեւ խոսքը ակնհայտ իրականացված հրեշավոր հանցագործության մասին է, որտեղ հայտնի է հանցագործը: Ուղղակի պետք է հետաքննություն անցկացնել եւ դատել օրենքի ողջ խստությամբ: Կարծում եմ՝ եթե դա կատարվի, ապա ամեն ինչ կլուծվի:

Իսկ ի՞նչ եք կարծում՝ ինչո՞ւ են Գյումրիում եւ Երեւանում եւ Հայաստանում՝ ընդհանրապես կասկածում, որ ռուսական իրավապահները կկարողանան անաչառ կերպով արդարադատություն իրականացնել:

Կասկածում են, որովհետեւ ենթադրյալ հանցագործը չի փոխանցվել հայկական իշխանություններին: Այս տարիների ընթացքում ռազմաբազայի կողմից Գյումրիի բնակիչների նկատմամբ իրավախախտումներ, իհարկե՝ ոչ այսպիսին, բայց կրկին եղել են: Կասկածներ կան, որ ռուսական արդարադատությունը միշտ չէ, որ արդար է դատում: Բացի այդ, այս դեպքն այնքան էմոցիոնալ է, որ մնացած ռացիոնալը հետին պլան է մղվում: Մարդիկ ուղղակի հուզվում են:

Ինչպե՞ս եք գնահատում Մոսկվայի առաջին արձագանքը հունվարի 12-ին Գյումրիում տեղի ունեցած սպանդից հետո: Ինչո՞ւ կատարվածի ողբերգականության լրջությունը ամենաբարձր մակարդակով չարձանագրվեց եւ չհանրայնացվեց ռուսական առաջատար լրատվամիջոցների կողմից:

Հեռուստատեսության առումով ասեմ, որ, ցավոք, դա բնորոշում է ռուսական հեռուստատեսության ներկայիս վիճակը, որը, գոնե վերջին տարին, իրականում ավելի շատ աշխատում է միայն քարոզչության ուղղությամբ: Իհարկե, Գյումրիում տեղի ունեցած սարսափելի հանցագործությունը չի նպաստում իշխանամետ քարոզչությանը, դրանից ռուսական իշխանության վարկանիշը չի բարձրանա: Ռուսական հեռուստատեսությունը վարժեցված է միայն բնակչությանն ու հեռուստադիտողներին հաճելի լուրեր հաղորդելուն, իսկ ոչ հաճելիներից խուսափում է:
Իսկ ինչ վերաբերում է իշխանություններին, ապա նրանք մասամբ չկողմնորոշվեցին, որովհետեւ երբ պարզ դարձավ, որ Գյումրիում ու Երեւանում հուզումները բավականին լուրջ են, Պուտինին զեկուցեցին, թե իրականում ինչ է տեղի ունենում: Այնուամենայնիվ, կայացավ հեռախոսազրույց Սերժ Սարգսյանի եւ Վլադիմիր Պուտինի միջեւ, որում Պուտինը ցավակցել է ինչպես անձնապես, այնպես էլ ողջ հայ ազգին եւ խոստացել, որ արդարադատությունը կհաղթի:

Ի՞նչ եք կարծում՝ գործը պետք է հանձնվի մե՞ր իրավապահներին, թե՞ այն պետք է վարի Ռուսաստանը:

Իմ կարծիքով՝ քանի որ հանցագործությունն իրականացվել է ռազմաբազայի տարածքից դուրս, այն իրականացվել է Հայաստանի տարածքում, ապա արդարադատությունը պետք է իրականացնեն հայկական իրավապահ մարմինները: Այն պետք է փոխանցվի Հայաստանին՝ դա իմ դիրքորոշումն է։

Իսկ ինչո՞ւ է Ռուսաստանն այդպես սկզբունքորեն եւ պինդ որոշել Պերմյակովին չհանձնել Հայաստանի արդարադատությանը:

Բանն այն է, որ Ռուսաստանի Դաշնության Սահմանադրությամբ՝ Ռուսաստանը իր հանցագործներին չի փոխանցում այլ երկրների, բայց, ինչպես երեւում է, այստեղ երկմտանք կա, որ եթե զինվորը հանձնվի Հայաստանին՝ դատավարության համար, ապա Ռուսաստանում դա կգնահատվի որպես ռուսական իշխանությունների թուլության դրսեւորում: Իմ կարծիքով՝ դա ճիշտ չէ: Նման դեպքերում պետք է հետեւել օրենքին. եթե հանցագործությունն իրականացվել է այլ երկրի տարածքում, ապա հանցագործին պետք է դատեն այդ երկրի մարմինները»:

Առավել մանրամասն՝ թերթի այսօրվա համարում