Արմավիրի մարզում շինպատվերների մենաշնորհը պատկանում է մարզպետի մերձավորի՞ն...

Օրերս տեղի ունեցած ուժեղ քամին փլուզել է Էջմիածնի Չարենցի 4 շենքի տանիքը և մինչ օրս խնդիրը լուծված չէ:
Բնակիչները Fnews.am-ի հետ զրույցում նկատում են` տանիքի խնդիրը նոր չէ: Դեռ նախանցյալ տարի այն դարձյալ վնասվել էր քամուց: Բնակիչներից Ալբերտը մեզ հետ զրույցում պատմում է, որ դեռ այն ժամանակ խնդրով դիմել են քաղաքապետարան, ու քանի որ վերանորոգման հարցով զբաղվում է «Խաչատրյան բիզինգ» ՍՊԸ-ն, ուստի այս ընկերության աշխատակիցներին էլ հանձնարարվել է նորոգման աշխատանքները:

«Աշխատանքը կիսատ-պռատ են արել, սվառկա էր պետք անել էնտեղ` չեն արել, ոնց որ թքով կպցրած: Դե էս քամիներն էլ էլի կռիշը պոկեցին տարան: Շիֆեռով-բանով, սաղ թափել ա: Քաղաքապետարանից եկել, տեսել են… հիմա տեսնենք ինչ կանեն»,- Fnews.am-ի հետ զրույցում ասաց Ալբերտը, ով ապրում է 5-րդ հարկում և քամու հետևանքների անմիջական տուժողներից է:

Օվսաննան ևս ապրում է 5-րդ հարկում: Ասում է, որ տանիքի վերանորոգման դիմումն արդեն իր իսկ ձեռքով քաղաքապետարան է տարել: Տանելը` տարել է, սակայն հույս չունի, որ խնդիրը շուտափույթ լուծում կստանա:

«Քաղաքապետարանից եկել, նկարել են, հարցրել են ինչ ա եղել, մենք էլ պատմել ենք: Մեզ ասել են դիմում գրեք: Դիմումը գրել ենք, բայց չգիտեմ, թե երբ կսարքեն: Տանիքից ամբողջ անձրևաջուրը ուղիղ մեր տուն ա լցվում: Բարձրանում եմ ցեալոֆոն եմ քաշում, մի կերպ յոլա գնանք, մինչև տեսնենք ինչ է լինում: Չնայալ հույս չունեմ, որ շուտ կլինի»,-ասում է Օվսաննան, ում խոսքով քաղաքապետարանը այս անգամ էլ տանիքի վերանորոգումը հանձնելու է նույն` «Խաչատրյան բիզինգ» ՍՊԸ-ին:

Հարկ է նկատել, որ նախորդ տարի Էջմիածնի Մաշտոց 63 շենքի տանիքի հիմնանորոգումը ևս տրվել է նույն ընկերությանը ու այս շենքի տանիքն այս տարի նույն ճակատագրին է արժանացել: Չնայած դրան` ամեն տարի մրցույթը շահում է դարձյալ միևնույն ընկերությունը:

Մրցույթը հայտարարող Արմավիրի մարզպետարանից Fnews.am-ը փորձեց պարզել, թե ինչով է պայամանվորված, որ շինարարական այլ կազմակերպությունների անուններ տանիքապատողների ցուցակներում չեն երևում:
Սակայն մարզպետ Աշոտ Ղարհամանյանի հեռախոսն անջատված էր, իսկ մարզպետարանի միջոցով չհաջողվեց կապ հաստատել աշխատակազմի ղեկավարի հետ:

Մեզ հասած տվյալներով` մարզպետ Աշոտ Ղահրամանյանը շահագրգռված է, որ միշտ մրցույթի հաղթող ճանաչվի Աշոտ Խաչատրյանին պատկանող ` «Խաչատրյան բիզինգ» ՍՊԸ-ն ու նրան տա շինպատվերները, քանի որ Աշոտ Խաչատրյանը մարզպետի մերձավոր շրջապատից է համարվում: 

Տաթեւիկ Աբրահամյան