Արմավիրի ոստիկանության օպերներն ասում էին պատվազուրկ կանեն, եթե իրենց ուզածով չգրի ցուցմունքը.

Արմավիրի մարզի առաջին ատյանի դատարանում երեկ հետաձգվել է Վլադիմիր Գավրիուշենկոյի, Մարտին Շահենյանի, Գոռ Հակոբյանի գործով դատավարությունը:

Գողության այս գործով կալանավորներից մեկը՝ Մարտեն Շահենյանը, դիմել է «Առավոտ»-ին՝ հայտնելով, որ կապ չունի կատարված հանցագործությունների հետ, որի պատճառով էլ նա 60 օր հացադուլ է արել:

Լրատվամիջոցը ներկայացնում է կալանավորի նամակը, որտեղ մասնավորապես ասվում է.

«Արմավիրի ոստիկանության քրեական բաժնի օպերներից 3-ը ինձ ահաբեկում էին իրենց կաբինետում, գիշերը, ինձ ասում էին, որ եթե իրենց ասած ձևով չգրեմ ցուցմունքս, որ իբր ես ու Վովան տաքսու վարորդի հետ պայմանավորված գնացել ենք գողության, ինձ պատվազուրկ կանեն: Նրանցից մեկը բռնի կռացրեց ինձ, մյուսն էլ ասաց՝ հեռախոսդ հանի, որ նկարես, մյուսն էլ ասում էր, որ հետևիցդ էդ նկարածը կուղարկեմ բերդ, որ բոլորն իմանան՝ դու ով ես: Ես ստիպված գրել եմ ցուցմունք, որն ամբողջությամբ սուտ է»:

Այնուհետև կալանավորն իր նամակում պատմում է, թե ինչպես է ինքնավնասման գնացել. կտրել է ձախ ձեռքի ծալքի գլխավոր երակը՝ փորձելով այդ ճանապարհով իր բողոքը հասցնել իրավասու մարմիններին:

Ինչպես պատմել է Մարտեն Շահենյանը, դատախազությունից խոստացել են, որ կպատժվեն օպերները, իր գործով նրանց կբերեն առերեսման, բայց նրանցից ոչ մեկին չեն բերել, այլ եկել են այլ օպերներ, որոնք մասնակից չեն եղել վերեը պատմածին:

Հոդվածն ամբողջությամբ կարող եք կարդալ «Առավոտ» օրաթերթի` 18.10.2014թ. համարում: