Արտագաղթելը թանկացավ. Ավիատոմսերը թանկացել են 10-15%-ով

«Արտագաղթելն էլ թանկացավ»,- այսպես բնորոշեց ավիատոմսերի թանկացումը Ռուսաստանում ապրող որդուն Ամանորին այցելել պատրաստվող թոշակառուն: Նա պատմեց, որ արտերկրում ապրել չի ուզում, գերադասում է մնալ հայրենիքում, բայց ամեն Նոր Տարի մեկնում է որդու մոտ` տոնն ընտանիքով դիմավորելու ու թոռներին տեսնելու:

«Տղաս փող էր ուղարկել, որ տոմս առնեի, պարզվեց, որ մի 10 000 դրամով գինն ավելացել է»,- պատմեց ավիատոմսերի վաճառքով զբաղվող ընկերության մոտ մեզ հանդիպած թոշակառուն:

Ընկերության գրասենյակում էլ հաստատեցին, որ ավիատոմսերի գները բարձրացել են` արտարժույթի փոխարժեքի տատանումների հետևանքով:

Ընդ որում, թանկացել են բոլոր ուղղություններով թռիչքների գները, և որքան հեռու` այնքան ավելի թանկ: Օրինակ ՌԴ քաղաքներ թռիչքների գինն ավելացել է 10 000-15 000 դրամով, իսկ եվրոպական երկրներինը` մինչև 25 000:

«Ավա տուր» ընկերության աշխատակիցը մեզ հետ զրույցում հայտնեց, որ Երևան-Մոսկվա չվերթի տոմսերը թանկացել են 7000 դրամով` նախկին 75000 դրամից դառնալով 68 000 դրամ:

«Թանկացումը բացառապես կապված է դրամի` դոլարի և եվրոյի նկատմամբ արժեզրկման հետ: Տոմսերը թանկացել են միայն դրամական արտահայտությամբ, իսկ դոլարով կամ եվրոյով դրանց գինը չի փոխվել»,- ասաց նա:

Ասել է թե` եթե ԱՄՆ դոլարի նկատմամբ ՀՀ դրամը վերջին մեկ ամսվա ընթացքում արժեզրկվել է շուրջ 12 %-ով, ապա կարող ենք ենթադրել, որ նույն չափով թանկացել են նաև ավիատոմսերը: