Արտակ Բուդաղյանը խորհուրդ տվեց այնպես վարվել, որ հետագայում « չամաչեք մարդկանց երեսներին նայել»

Սյունիքի մարզի առաջին ատյանի ընդհանուր իրավասության դատարանը օգոստոսի 21-ին կհրապարակի Սյունիքի մարզպետ Սուրիկ Խաչատրյանի առանձնատան մոտ զինված միջադեպի գործով դատավճիռը:

Հիշեցնենք, որ գործով միակ ամբաստանյալը Արտակ Բուդաղյանն է՝ նրա եղբայրը՝ Ավետիք Բուդաղյանը, միջադեպի ժամանակ սպանվել էր, իսկ ինքն էլ ստացել ծանր մարմնական վնասվածքներ: Այդուհանդերձ, նախաքննական մարմինը նրան առաջադրել է մարզպետի ու նրա հարազատների հասցեին սպանության սպառնալիքներ տալու մեղադրանք, նախկին մեղադրյալներ, մարզպետի որդու՝ Տիգրան Խաչատրյանի և հանրահայտ Զարզանդ Նիկողոսյանի նկատմամբ քրեական հետապնդումը դադարեցվել էր, իսկ սպանված Ավետիք Բուդաղյանի նկատմամբ որոշվել էր քրեական հետապնդում չիրականացնել՝ մահվան հիմքով:

Այսօրվա դատական նիստում Արտակ Բուդաղյանի պաշտպան Հայկ Ալումյանն իր պաշտպանական ճառում միջնորդել է իր պաշտպանյալի նկատմամբ կայացնել արդարացման դատավճիռ, իսկ Արտակ Բուդաղյանն էլ իր վերջին խոսքում նշել է՝ « բոլորդ էլ իրավաբաններ եք, լավ գիտեք, թե ինչ է եղել»: Նա խորհուրդ է տվել այնպես վարվել, որպեսզի «չամաչեք մարդկանց, տան դուռը բացելիս սեփական թոռների ու երեխաների երեսներին նայել»:

մանրամասն՝ pastinfo.am-ում