«Աշխատավարձի պարտքի» մարում. նաիրիտցիներն Ազատության հրապարակում են այս կարգախոսով ու պահանջով

Tert.am-ը գրում է.

«Նաիրիտ» գործարանի կրճատված ու գործող մի քանի հարյուր աշխատակիցներ մայիսի մեկին` Աշխատավորների միջազգային օրը հավաքվել են Ազատության հրապարակում և սպասում են ՀՀ Նախագահ Սերժ Սարգսյանին, ով Օպերայի և բալետի ակադեմիական թատրոնում մասնակցելու է տոնական համերգի:

Հիշեցնենք, որ այս պահին գործարանի աշխատակիցներին պարտքը մոտ 12 ամսվա է: 2015թ. փետրվարի 6-ին, համաձայն 2014թ. դեկտեմբերի 2-ից ընկերության բոլոր աշխատողներին բաժանված ծանուցագրերի, 1700 մարդ ազատվել էր աշխատանքից:

Բողոքի ակցիայի մասնակիցները պարբերաբար վանկարկում են «պարտքի մարում». Նրանք Ազատության հրապարակ են եկել նաև այլ պաստառներով՝ «ՀՀ քաղաքացին պաշտպանված չէ», «Հայաստանում աշխատավորի իրավունքները ոտնահարվում են», և այլն։ 

Ազատության հրապարակում է  ՀՀ փոխոստիկանապետ Վալերի Օսիպյանը, ով նախ բարձրախոսով շնորհավորեց նաիրիտցիներին՝ Աշխատավորների միջազգային օրվա կապակցությամբ, ապա կոչ արեց ենթարկվել ոստիկանության օրինական պահանջներին:

Ավելի ուշ տեղեկություններ ստացվեց, որ ՀՀ Նախագահն արդեն Օպերայի և բալետի թատրոնի շենքում է, և նաիրիտցիները, մտածելով, որ ՀՀ Նախագահը թատրոնի տարածք է մուտք գործել այլ մուտքով, հետևաբար իրենց սպասելն անիմաստ է, որոշեցին երթով գնալ դեպի կառավարություն, որտեղ և կհնչեցնեն իրենց պահանջը և կհեռանան:

«Նաիրիտի» մամուլի քարտուղար Անուշ Հարությունյանը տեղեկացրեց, որ ինչպես ամեն երեքշաբթի ժամը 11-ին, գալիք երեքշաբթի էլ կհավաքվեն նախագահական նստավայրի դիմաց: