Այրվել է Արայիկ Գրիգորյանի թիմակիցներից մեկի մեքենան

Fnews.am-ին հասած տեղեկությունների համաձայն, երեկ Արարատի մարզի Ոստան համայնքում, ժամը 22:30–ի սահմաններում Արայիկ Գրիգորյանի շտաբի առջեւ այրվել է թեկնածուի թիմակիցներից մեկին պատկանող ՋԻՓ «Լանդ Քրաուզեր» մակնիշի ավտոմեքենան:

Նույն լուրերի համաձայն, մեքենան պատկանում է ռեյտինգային ընտրակարգով առաջադրված ՀՀԿ-ական թեկնածու Արայիկ Գրիգորյանի համագյուղացի՝ Վարազ անունով մի անձնավորության, ով ասում են՝ Գրիգորյանի նվիրյալներից է:

Մարզում խոսում են, որ այրված մեքենայի վրա առկա են եղել բենզինի հետքեր, իսկ բռնկված հրդեհը հավաքվածները մի կերպ կարողացել են մարել:
Միջադեպից հետո համայնքում, եւ մարզում ըմբոստության եւ դժգոհության նոր ալիք է բարձրացել, քանի որ մարզի բնակիչներից շատերը չեն վարանում կիսվել իրենց տպավորություններով, ակնարկելով որ այս գործերի հետեւում կարծես թե շատ երկար ու մեծ ականջներ են կախված…
Կամ ինչպես նշեց Արարատի մարզի բնակիչներից մեկը. «Էս մարզում էնքան շատ են կրծողները, որ ոնց լինի՝ մի կրծողի   պոչ կգտնեն՝թե լավ ման գան»…

Հ.Գ
Որքան էլ որ զարմանալի է, ու գուցեեւ շատերի քիմքին ոչ այնքան հարիր, բայց փաստ է, որ բոլոր խաղաքարերը այս մարզում պտտվում են Գրիգորյաններ ընտանիքի, մասնավորապես ռեյտինգային ընտրակարգով առաջադրված թեկնածու Արայիկ Գրիգորյանի շուրջը:
Բացատրենք ինչու. որովհետեւ սկզբում նյարդերի, հետո արդեն կոնկրետ գործողությունների ու բեսպրեդելի դրսեւորումների արդյունքում տպավորություն է ստեղծվում, որ Գրիգորյանների դեմ ամենաճղճիմ ու ստորաքարշ մեթոդներով պայքարում են իբր մրցակից թեկնածուները:
Մի փնթի գործեալոճ՝որը ոչ իսկական հայ տղամարդուն է հարիր, ոչ քաղաքականության լոգոյի տակ հանդես եկող որեւէ թզուկի…

Հիշեցնենք, որ այս մարզում սկզբում Մուրադը կատաղեց՝ պատգամավորության թեկնածու Մուրադ Մուրադյանը, հետո որոշակի ջղաձգումներ նկատվեցին Ալիկ Սարգսյանի շտաբի ներկայացուցիչների կողմից, դե իսկ հետո էլ չգիտես ինչու եւ ինչպես այրվեց պատգամավորի թիմակցի մեքենան: Այս կարճ ժամանակահատավածում զուգադիպությունների շարանը մի քիչ շատ չէ՞:
Այս ամենն ուղղակի ապսուրդի թատրոն է հիշեցնում, բայց չպետք է մոռանալ հայտնի ժողովորդական բանահյուսության մասին, որ փոս փորողը ի վերջո հենց ինքն է փոսն ընկնում: Պարզապես հայաստանյան իրականության պարագայում շատ ու շատ այդպես էլ չկայացած ու ինտրիգների սիրահար երեւույթներ փոսն ընկնելու դեպքում անգամ՝ փորձում են կենդանության նշաններ ցույց տալ, ինչն իրականում ազդում է առանց այն էլ նրանց զրո դարձած հեղինակության վրա:

Վերջին հաշվով, խռովություններ ստեղծողների ու նաեւ դրանք հրահրողների ջատագովները պետք է գիտակցեն մի պարզ բան. նմանատիպ քայլերով ու մեթոդներով նրանք ոչ ավել, ոչ պակաս նետեր են լարում նույն այսօրվա ՀՀ իշխանությունների դեմ, քանի որ ո'չ հայ հասարակության, եւ ո'չ էլ միջազգային հանրության աչքից որեւէ բան չի վրիպում: այդ Այդ ամենի համար հետագայում թանկ ենք վճարում՝ ազգովի:

Արարատի մարզում ընթացող նախընտրական զարգացումների մասին՝ առավել մանրամասն՝ կխոսենք հաջորդիվ: