Այսօր էլ նացիզմը պետք է դատապարտվի. Հայկ Բաբուխանյան

«Ադրբեջանը կրկին սկսել է իր նացիստական դրսեւորումները Հայաստանի եւ Արցախի հանրապետությունների սահմաններում: Այս օրերին, հենց այս րոպեներին կրակոցներ են ընթանում եւ ռմբակոծվում են մեր գյուղերն ու սահմանները: Մենք պետք է խնդրենք Աստծուն, որ մեր զինվորները լինեն պինդ, հաղթական եւ անփորձանք ու թշնամուն՝ օկուպանտին, ետ մղեն», - «Ուժեղ Հայաստան Ռուսաստանի հետ.  հանուն նոր Միության»  շարժման կազմակերպած «Աշխարհն առանց նացիզմի եւ հանուն ավանդական արժեքների» խորագրով  համաժողովի ժամանակ իր ելույթում ընդգծեց   շարժման գործադիր կոմիտեի անդամ, ՍԻՄ կուսակցության նախագահ ՀԱՅԿ ԲԱԲՈՒԽԱՆՅԱՆԸ:

Լինելով «Ղրիմի բարեկամներ» հայաստանյան ակումբի  ղեկավարը՝ նա հիշեցրեց, որ նացիզմ այսօր դրսեւորվում է նաեւ Ղրիմի հանրապետության դեմ. «Նացիզմ կա Ուկրաինայում, եւ ես տեսել եմ, թե ինչպես էին դրա հետեւանքով ջրից զրկված  Ղրիմի դաշտերը չորանում, ինչպես էին մարդիկ տանջվում: Այն, ինչ չէին կարողանում անել ուժով, փորձում էին ստիպել ջրի բացակայությամբ: Մենք սա տեսել ենք նաեւ մեր մաշկի վրա եւ չենք կարող լռել այդ անարդարության մասին»:

ՍԻՄ կուսակցության նախագահը շեշտեց, որ այսօր էլ նացիզմը պետք է դատապարտվի՝ լինի այն թուրքական, ուկրաինական, ադրբեջանական, թե՝ որեւէ այլ.  «Նացիզմն է աշխարհում դժբախտությունների եւ հատկապես՝ հայ ժողովրդի դժբախտությունների աղբյուրը: Թուրքական նացիզմը 1915 թվականին կազմակերպեց այն ցեղասպանությունը, որը մինչ օրս աշխարհը, որը թվում է՝ արդար է եւ ազնիվ, այդպես էլ չդատապարտեց»:

Անդրադառնալով հազարամյակներով պահպանված ազգային, ավանդական արժեքներին՝ Հայկ Բաբուխանյանն ասաց, որ այսօր այդ արժեքները եւս ճնշման են ենթարկվում. «Ինչ Սովետական միությունը քայքայվեց, մեր երկիր լցվեցին տարբեր տեսակի «ագենտներ», աղանդներ, մարդիկ, որոնք հեռու են քրիստոնեական բարքերից: Այս ամենը վտանգում է մեր ներկան եւ երեխաների ապագան: Մեր ազգային համակարգը, ավանդական ընտանիքը, մեր ազգային եկեղեցին, ավանդույթները, մեր բարոյականությունը պետք է պահպանենք, ամրապնդենք: Այս մասին մենք ասել ենք նաեւ մեկ տարի առաջ՝ մեր շարժման հիմնադիր համագումարում»: 

Հ.Գ.- Ելույթն ամբողջությամբ դիտե՛ք տեսանյութում.