Այսքանից հետո`փողերը կերել են, թե ոչ, թողնում եմ ընթերցողի հայեցողությանը

Fnews.am-ի զրուցակիցն է ԱԺ ՀՀԿ խմբակցության պատգանավոր ֆինանսատնտեսկան հանձնաժողովի անդամ ՍՈՒՔԻԱՍ ԱՎԵՏԻՍՅԱՆԸ, ում հետ զրուցեցինք Հայաստանի ԵՏՄ-ին անդամակցության, դոլարի կտրուկ արժեւորման եւ ներկայիս գյումրեցիների խնդիրների լուծման մասին:
- Պարոն Ավետիսյան, օրերս ակտիվ շրջանառության մեջ դրվեցին խոսակցություններ այն մասին, որ կապված Ղազաղստանի հետ` հնարավոր է ֆորսմաժորային իրավիճակ ստեղծվի եւ մինչեւ հունվարի տասնհինգը Հայաստանը չանդամագրվի ԵՏՄ-ին: Ի՞նչ կասեք այդ առումով, արդյո՞ք նման մտավախություն իրոք կա:
- Ֆորսմաժորային իրավիճակ չի լինի, որովհետեւ ԵՏՄ-ին Հայաստանի անդամակցությունը եղել է նախագահների մակարդակով պայմանավորվածություն, փաստաթղթի ստորագրում, որից հետո սկիզբ է դրվել չորս պետություններում վավերացման գործընթացին: Հիմա մեզ մոտ եւ ՌԴ-ում ավարտվել է այդ գործընթացը, եւ կարծես, թե խնդիր չկա ոչ Ղազաղստանի եւ ոչ է Բելառուսի կողմից, որովհետեւ, ըստ իմ ունեցած տեղեկությունների, մնացած երկու պետություններն էլ հավաստել են, որ մինչեւ տարեվերջ այդ փաստաթուղթը կվավերցնեն, այլապես ԵՏՄ-ն չի լինելու: Այնպես, որ հունվարի մեկից ԵՏՄ-ն, որպես այդպիսին կսկսի աշխատել:
-Դրամի արժեզրկումը օր-օրի մեծ չափերի է հասնում, որն էլ նպաստում է գնաճին: Ի՞նչ ելք եք տեսնում այս ամենից, ինչո՞ւ ԿԲ-ն ավելի կտրուկ քայլերի չի դիմում, որպեսզի կարողանա մեղմել դրամի արժեզրկումը:
-Սովորաբար նման իրավիճակում ԿԲ-ի կտրուկ միջամտել սխալ կլինի, առավել եւս, որ խնդիրը ոչ միայն Հայաստանում է, այլեւ ՌԴ-ում նույնպես ռուբլին գահավիժում է: ԿԲ-ն, իհարկե, արդեն իսկ սկսել է վերջին օերին օրական վեց միլիոն դոլար շուկա մտցնել, որպեսզի այդ խնդիրը շատ կտրուկ չարտահայտվի: Մեզ մոտ միշտ էլ տարեվերջին եղել են նման խնդիրներ. դրամի արժեզրկում եւ գների թանկացում: Բայց այս տարի պայմանավորված նաեւ ԱՄՆ-ի եւ եվրոպական միության կողմից ՌԴ-ի նկատմամբ պատժամիջոցների կիրառմամբ եւ նավթի գնի անահամաչափ անկումով, բնական է այդ խնդիրները պետք է առաջ գային:
Կարծում եմ, որ դեռ մի շաբաթ այդ տատանումները կլինեն, դրանից հետո որոշակի կայուն վիճակ կստեղծվի:
- Պարոն Ավետիսյան, քանի որ Դուք եւս գյումրեցի եք, հետաքրքիր է Դուք կիսո՞ւմ եք Գյումրիի նախկին քաղաքապետ Վարդան Ղուկասյանի այն տեսակետը, որ աղետին գոտու համար տրամադրված գումարները թալանվեցին Լեւոն Տեր-Պետրոսյանի եւ ՀՀՇ-ի օրոք:
- Այսպես ասեմ, Լեւոն Տեր-Պետրոսյանի իշխանության օրոք գրեթե աղետի գոտում` հատկապես բնակարանաշինությանը ուշադրություն չդարձվեց: Միայն 1996-1997թթ.-երից հետո նոր միայն սկսեցին Համաշխարհային բանկի վարկային ծրագրով սկսվեց շինարարությունը: Լեւոն Տեր-Պետրոսյանի ժամանակ շատ մեծ վարկեր են վերցվել` աղետի գոտու տնտեսության վերակնգման համար, բայց այդ վարկերը փոշիացվել են, այսինքն նպատակին չեն ծառայեցվել: Վարկը վերցրել է Համաշխարհային բանկի համաձայնագրով, ըստ որի որ պետք է ստեղծվեր իքս թվով աշխատեղ, բայց դե ֆակտո այդ բոլոր փողերը վերցվել են` ձեռնարկություների մի մասը կառուցել են, մի մասը չէ: Եվ արդյունքում այդ ձեռնարկությունները որպես այդպիսին չկան եւ ոչ մի աշխատատեղ չկա: Ես արձանագրեցի փաստերը, իսկ թե այսքանից հետո ով ինչպես կընկալի` փողերը կերել են, թե ոչ, թողնում եմ ընթերցողի հայեցողությանը:

Նոնա   Ադամյան