Այսուհետ մենք կունենանք ոչ թե արտահերթ նիստեր, այլ արտահերթ «սխոդկաներ»

Մազ էր մնում ասելու, որ քաղաքական թատրոնի ամառային սեզոնը հայտատարվում է փակված, երբ լեզվի մի հարվածով ԱԺ պատգամավոր Նիկոլ Փաշինյանը ալեկոծեց քաղաքական դաշտն ու այնտեղ հանգրվանած մանդատավորներին, որոնցից շատերը ըստ էության կուսակցական կամուֆլյաժի տակ փորձում են «կեղտոտ ջրում ձուկ բռնել»: Եւ հատկանշականն այն է, որ այս օրերին այդ գործին հատկապես լծվել են «ընդդիմադիրա- ժողովրդավարա-այլընտրանքա-ոչ իշխանային հատվածի»՝ «իշխանամետ-ընդդիմադիրները»… Կարճ ասած, այս օրերին «հայրը՝ զավակին չի ճանաչում»: Այստեղ խոշոր բացահայտումներ են կատարվում միայն քաղաքական պապաներին ջրի երես հանելու ուղղությամբ:

Փաստորեն պատգամավոր Փաշինյանի հայտարարությունից պարզ է դառնում, որ վարչապետ Հովիկ Աբրահամյանը լուրջ ռիչակներ ունի «բամփելու» ոչ միայն իշխանական մանր-մունր չինովնիկներին, այլ նաեւ իշխանությունից իրենց դուրս համարող քաղաքական թիմերին:

Մի խոսքով, Փաշինյանը մի զարկով խառնեց խաղաթղթերն ու «կոնին» դրեց Բարգավաճ Հայաստանի վարկն ու հեղինակությունը...

Արգամի՛չ, էս ի՞նչ հաշիվ ա, ուտեչկեք ա, որ գնում ա... Բա եթե ջղայնանալու հնարավորություններ կային՝ բոլորին հայտնի քաղաքական գործընթացների ժամանակ, ինչո՞ւ գործը հասավ բամփելուն...
Արգամիչ, կարո՞ղ ա ջղայնացել ես...
Էդ դեռ կերեւա:
Հիմա գանք քաղաքական թատրոնի երկրորդ արարքին.այսօր խորհրդարանում պատգամավոր Փաշինյանը, ով շատերի գնահատմամբ փորձում է մոնոպոլացնել ընդդիմադիր դաշտը, բանից պարզվեց, որ ոչ միայն ԲՀԿ-ին հիշեցրեց իր անցյալն ու ներկան, այլ նաեւ հիշեց վերածնված ՕԵԿ-ին, որի ժամանակ էլ «մարտում հերոսաբար կռիվ տվեց» ՕԵԿ խմբակցության ղեկավար, առյուծասիրտ Հեղինե Բիշարյանը:
Եւ այսպես, ՕԵԿ խմբակցության ղեկավար Հեղինե Բիշարյանը պատգամավոր Նիկոլ Փաշինյանի՝ իրենց քննադատող ելույթի ժամանակ գոռում էր. «Համբալ, շիշը կտամ գլխիդ»:

Իր ելույթի ընթացքում Հեղինե Բիշարյանն էլ հայտարարեց. «Եթե այստեղ եկել եք, պատմում եք ողորմելի, լրագրողական մակարդակի գնահատականներով, ներողություն եմ խնդրում բոլոր պարկեշտ լրագրողներից, դա դեռ չի նշանակում, որ այդ ձեռագիրն աշխատելու է այսուհետ: Դուք ձեր քթին ուտելու եք, ձեր ասածների համապատասխան պատասխանները լինելու են: Մարտի մեկի արյունը հենց քո վրա է, որովհետև ժողովրդին մոլորեցնելով, պարահրապարակ անելով, հեղափոխության կոչեր անելով տարաք հեղափոխության և խղճներդ հանգիստ նստեցիք: Կանչել էիք ժողովրդին, տեր կանգնեիք, տանեիք ձեր հեղափոխությունը մինչև վերջ: Կյանքը ցույց տվեց, թե ով էիք և ինչ կարող էիք անել»,- Փաշինյանին դիմեց Հեղինե Բիշարյանը:

Նա նաև Փաշինյանին հարցերը դրսում լուծելու առաջարկ արեց. «Չափներդ ճանաչեք, եթե չափվելու տեղ եք ուզում, եկեք դահլիճից դուրս: Եթե շատ ուժեղ տղերք եք, եկեք տղայական ռազբորկի, ոչ թե էստեղ վազելով երկու բառ ասեք ու թռեք»:
Ըստ ամենայնի, քաղաքական «ռազբորկաների» հանրագումարում, Հայաստանում մենք շուտով կունենանք նոր քրեական հեղինակություններ, ովքեր գողական աշխարհը կհամալրեն ականավոր դեմքերով:
Հայրենի մանդատավորներից շատերը կբռնեն գողական աշխարհի ճանապարհը... Գուցե ոմանք ճշտով գնան ու վայելեն գողերի ու գողականների հարգանքը, որից հետո արդեն խորհրդարանում տեղի կունենան ոչ թե արտահերթ նիստեր, այլ արտահերթ «սխոդկաներ»:

Հիմա դուք գողական ե՞ք, թե՞ դեպուտատ…ընկեր մանդատակիրներ:

Դե ինչ, մեզ մնում է հաջողություններ մաղթել
ՀՀ-ի նորագույն գողական գնացողներին՝ իրենց կյանքի նոր ո ւ դժվարին փուլում:
Հուսով եմ, Ձեր կյանքի այս կարեւորագույն եւ լրաջագույն «բարեփոխումների» էտապում վաստակ ու հարգանք ունեցող գողականները, թոշակի չեն գնա:

Գայանե Զարգարյան