Ազատամարտիկներին ծեծի ենթարկելը նորություն չէ. ԱՍԱԼԱ-ի մարտիկ

Հայաստանը մշտապես շեշտը դնում է բանակցային գործողությունների վրա, այնինչ պետք է երկու անգամ ավելի ուժգին պատասխան տա Ադրբեջանի ամեն մի կրակոցին»,- այսօր հայտարարեց ԱՍԱԼԱ խմբավորման մարտիկ Վազգեն Սիսլյանը։ Ազատամարտիկը համոզված է՝ մեր բանակը ունի այդ հնարավորությունը։

Ղարաբաղաադբեջանական սահմանին խոցված ուղղաթիռի մասին խոսելով՝ պարոն Սիսլյանը ասաց. «Իմ ուզած պատասխանը մերոնք չտվեցին, բայց գոնե, որ աճյունները կարողացան ետ վերադարձնել, լավ է»։

Սահմանին վիճակը պատերազմական է՝ հայտարարում է Վազգեն Սիսլյանը. «Ամեն օր զինվոր է զոհվում։ Դա պատերազմական չէ՞»։

«Ա1+»-ի հարցին, թե ինչպես է ազատամարտիկը վերաբերվում, այն փաստին, որ վերջին օրերին մի քանի ազատամարտիկների են ծեծի ենթարկել, պարոն Սիսլյանը ասաց. «Ես վերջին օրերին զբաղված էի ու մանրամասն չգիտեմ՝ ինչ է տեղի ունեցել։ Բայց այն, որ ազատամարտիկներին ծեծի են ենթարկում, նորություն չէ»։

Մեր հաջորդ հարցին, թե ինչպես է Վազգեն Սիսլյանը վերաբերվում Ջեմալ Փաշայի թոռան այցին Հայաստան։ Հիշեցնենք, որ նա հայտարարել էր, թե իր պապին ոչնչացնողները «հրոսակ» են, ԱՍԱԼԱ-ի տղաները՝ «ահաբեկիչ», իսկ Արցախն էլ՝ «օկուպացված»։ Սիսլյանը արձագանքեց. «Ինձ չի հետաքրքրում Թուրքիայի կարծիքը, թե ԱՍԱԼԱ-ն ինչ է։ Եթե անգամ նրանք ընդունեն ցեղասպանությունը, ասեն՝ կներեք, ի՞նչ դրանից։ Մեզ պետք է , որ Արեւմտյան Հայաստանը վերադարձնեն»։