Ազատամարտիկները սպասում էին, որ հանրահավաքը չի ավարտվելու հրաժեշտի խոսքերով. Հրապարակ

Հիասթափություն եւ ոգեւորություն միախառնվել են իրար: Հոկտեմբերի 24-ի հանրահավաքը եւ առաջիկայում շաբաթը մեկ նախատեսված հանրահավաքների շարքը հույսի շող են արթնացրել ոմանց սրտում: Սակայն ոմանք էլ թեւաթափ են՝ սպասում էին, որ հանրահավաքը չի ավարտվելու հրաժեշտի խոսքերով, որ նստացույց-հացադուլ-զորահավաք է սկսվելու: Մարդկանց ոչ թե տուն են ուղարկելու, այլ պահելու են Ազատության հրապարակում, եւ մի քանի օր կամ շաբաթ, կամ ամիս անց իշխանափոխություն է տեղի ունենալու: Համենայնդեպս, այդպես էին կարծում եռյակի պայքարին միացած ազատամարտիկները, երիտասարդ հեղափոխականներն ու երկարամյա պայքարից հոգնած մարդիկ:

Ավաղ, անգամ Րաֆֆի Հովհաննիսյանի հերթական ջանքերն անարդյունք անցան՝ նստացույց չեղավ, ընդամենը հայտարարվեց հաջորդ հանրահավաքի մասին: Բայց արձանագրենք, որ Գագիկ Ծառուկյանի «բեմելն» այնքան էլ անհաջող չէր՝ գրավոր տեքստը կարդալիս միայն մի տեղ սայթաքեց, իսկ բանավոր տեքստը, կարելի է ասել, անգամ ավելի լավն էր, քան Լեւոն Տեր-Պետրոսյանինն ու Րաֆֆի Հովհաննիսյանինը:

Այնպես որ, հրապարակի «ուսումնառությունն» սկսված է, եւ մի քանի տարի անց մենք կունենանք հրապարակային պայքարի որոշակի փորձառություն եւ հռետորական որոշակի ունակություններ որդեգրած գործիչ: Ընթացքում էլ կմոտենա հերթական ընտրությունների ժամկետը, եւ եթե հրապարակն այս ընթացքում «տաք» պահեն ու բարեգործությամբ էլ մարդկանց սրտերը շահեն, գուցե Սերժ Սարգսյանն էլ հանգի այն մտքին, որ «Ծառուկյանից լավը չկա»: Ինչպես ժամանակին նման մտքի հանգեց Ռոբերտ Քոչարյանը՝ Սերժ Սարգսյանին իրավահաջորդ ընտրելով: Այս սցենարի պարագայում, ինչպես ասում են, եւ գառները ողջ կմնան, եւ գայլերը՝ կուշտ: Մնում է հասկանալ, թե երկրի ու ժողովրդի վիճակն ինչ կլինի