Ազդարա՞ր, թե՞ «գործ տվող»

«Փաստ» օրաթերթը գրում է. Կոռուպցիայի դեմ «անհաշտ պայքար» հռչակած Հայաստանի իշխանությունը նոր ճանապարհներ է որոնում կոռուպցիայի դեմ պայքարը հանրայնացնելու համար, որ այն ավելի հրապարակային ու տեսանելի լինի: Ինչպես հայտնի է՝ բարձրաստիճան պաշտոնյաների էթիկայի հանձնաժողովը վերափոխվում է հակակոռուպցիոն նոր մարմնի: Սրան զուգահեռ էլ իշխանությունը արդարադատության նախկին նախարար, ԱԺ փոխնախագահ Արփինե Հովհաննիսյանի ձեռամբ փորձում է «ազդարարի» ինստիտուտ ներդնել: Ինչ է այն իրենից ներկայացնում. հանրության շրջանում այս համակարգը կարող է ընկալվել «գործ տվող» բնորոշմամբ: Ըստ այդմ՝ ազդարարը «սույն օրենքով նախատեսված կարգով բարեխղճորեն հաղորդում է տեղեկություններ կոռուպցիոն բնույթի դեպքի կամ հանրային շահերին ուղղված այլ վնասի կամ դրանց սպառնալիքի վերաբերյալ»: Ըստ օրենքի հեղինակ Արփինե Հովհաննիսյանի՝ ազդարարման նպատակներն են՝բացահայտել կոռուպցիոն բնույթի դեպքերը կամ հանրային շահերին ուղղված այլ վնասները, նվազեցնել և կանխարգելել կոռուպցիան, նպաստել կոռուպցիայի նկատմամբ հասարակական անհանդուրժողական վերաբերմունքի ձևավորմանը: Ընդ որում՝ ազդարարի ինստիտուտը ներդրվում է ինչպես պետական, այնպես էլ ոչ պետական կազմակերպություններում՝ ապրանքային շուկայում մենաշնորհ կամ գերիշխող դիրք ունեցող, ինչպես նաև առողջապահության, սպորտի, կրթության, մշակույթի, սոցիալական ապահովության, տրանսպորտի և կապի, կոմունալ ոլորտներում հանրությանը ծառայություններ մատուցող ոչ պետական կազմակերպություններ: Ազդարարը կարող է տեղեկություն ներկայացնել ինչպես իր անունից, այնպես էլ անանուն: Ըստ այդմ՝ ստեղծվում է միասնական էլեկտրոնային հարթակ, որը վարելու է ՀՀ կառավարությունը: Ասել է թե՝ կոռուպցիոն շարժերի մասին ողջ տեղեկությունը հավաքագրվելու է կառավարությունում ու այն վերահսկելու է կոռուպցիոն բնույթի տեղեկությունները: Այլ կերպ ասած՝ ստանձնելու է ԱԱԾ գործառույթ: Օրենքով նաև պատիժներ է նախատեսվում ազդարարին կամ նրան փոխկապակցված անձին վնաս հասցնելու, նրա պաշտոնը իջեցնելու համար: Իսկ եթե ազդարարի ոչ բարեխիղճ գործողությունը պարունակում է հանցագործության հատկանիշներ, հաղորդումը ստացած անձը պարտավոր է անհապաղ այդ մասին հայտնել դատախազությանը: Կառավարության լիազոր մարմինը երաշխավորում է ազդարարի պաշտպանությունը՝ ապահովելով նրա անանունությունը: Միասնական էլեկտրոնային հարթակ մուտքագրված անանուն յուրաքանչյուր հաղորդման հաշվառումը, քննարկումը, իր իրավասությունների շրջանակներում միջոցների ձեռնարկումը, անհրաժեշտության դեպքում համապատասխան ակտի ընդունումը և դրա փաստացի կատարումը:

Շարունակությունը` «Փաստ» օրաթերթի այսօրվա համարում