ԲԱԲՈՒԽԱՆՅԱՆԸ ՄԵՂԱԴՐԵՑ ՓԱՇԻՆՅԱՆԻՆ ՍՏԱԽՈՍՈՒԹՅԱՆ ՄԵՋ

Այսօր իր մամլո ասուլիսի ժամանակ Նիկոլ Փաշինյանը հայտարարեց, թե իբր ոչ մի ընդդիմադիր կուսակցություն չի դատապարտել  այն բռնի գործողությունները, որոնք իրականցվել են նոյեմբերի  10-ի գիշերը ԱԺ փոխանախագահ Արարատ Միրզոյանի նկատամբ: Այս կապակցությամբ ՍԻՄ կուսակցության նախագահ Հայկ Բաբուխանյանը նշեց, որ «Նիկոլը ինչպես միշտ ստում է: Անմիջապես այդ դեպքի մասին տեղեկանալուց հետո  նոյեմբերի 10-ին, լուսադեմին ժամը 4:58 րոպեին հանդես եմ եկել հայտարարությամբ, որտեղ նշել եմ, որ պայքարը պետք է լինի առանց բռնության եւ կոչ եմ արել ներկայիս վարչակազմի հանդեպ չկատարել բռնի գործողություններ եւ չենթարկվել սադրանքների»:

Հ. Բաբուխանյանը նաեւ անդրադարձավ Նիկոլի այն հայտարարությանը, թե ընդդիմադիր կուսակցությունների կողմից  պատերազմական իրավիճակը բարելավելու առաջարկներ չեն եղել: «Ես անձամբ  արել եմ մի շարք առաջարկություններ, այսպես՝ հոկտեմբերի 2-ին ես հայտարարել եմ, որ Նիկոլը պետք է դիմի ՌԴ-ին: Հոկտեմբերի 18-ին, ՀԱՊԿ մի շարք կառույցներում հանդիպումներից հետո, նույնպես հայտարարություն եմ արել, որ պետք է ստեղծել Ազգային փրկության կոմիտե եւ պետք է դիմել ՌԴ-ին: Հոկտեմբերի 27-ին Արցախից վերադառնալուց, Գորիսում հայտարարություն եմ արել, որ իրավիճակը օրհասական է, պետք է ստեղծել Ազգային փրկության կոմիտե եւ դիմել ՌԴ-ին խաղաղապահներ հրավիրելու համար: Վերջապես, երբ հոկտեմբերի 31-ին Նիկոլը կիսատ-պռատ դիմեց ՌԴ-ին, ես զանգահարել եմ իր անմիջական շրջապատի շատ բարձր պաշտոնյային՝ ասելով, որ ՌԴ-ի հետ հարաբերությունների առնչությամբ ունեմ հրատապ առաջարկություններ, որոնք կարող են փոխել իրավիճակը: Սակայն հանդիպման մասին իմ առաջարկությունը  այդպես էլ մնաց անպատասխան:

Բացի այդ ինձ հայտնի է, որ պատերազմի հենց առաջին օրվանից Նիկոլի շրջապատին փոխանցվում էին  աջակցության առաջարկություններ, որոնք այդ շրջապատը ի պաշտոնե պարտավոր էր փոխանցել Նիկոլին , սակայն այդ առաջարկությունների հեղինակները որեւէ արձագանք չէին ստանում:

Այսպիսով՝ Նիկոլը ստում է, ինչպես ստել է վերջին երեք տարին: Սակայն այդ ստի համար մեր ժողովուրդը վճարել է անասելի թանկ գին: Բայց Նիկոլի համար երեւի այդ զոհաբերությունն էլ քիչ է եւ նա հույս է դրել քաղաքացիական բախումների վրա, ինչի վկայությունն է նրա գիշերային կոչը: Առաջարկում եմ Նիկոլին սահմանափակվել այն հանցանքներով, որը նա կատարել է հայ ժողովրդի հանդեպ եւ իր ապօրինի պաշտոնավարումը երկարաձգելու նապատակով նոր հանցանքներ չգործել: Հեռանալ անմիջապես եւ առանց  ցնցումների: Նիկոլի շրջապատին  առաջարկում են անմիջապես սահմանազատվել Նիկոլի  կատարած եւ ծրագրված հանցանքներից»:

Iravunk.com

 Ա. Հովհաննիսյան