Բանակցե՞լ.Ադրբեջանը չի հասկանում այդ լեզուն, պետք է մի երկու ռակետ ուղարկել Բաքու

«Ադրբեջանը չկարողացավ հաղթել, այն, ինչ Ադրբեջանը պլանավորել էր, շատ արագ մեր կողմն օգնեց, որ ձախողեն»,-ԳԱԼԱ-ի հետ զրույցում հայտարարեց Արցախյան ազատամարտի հերոս, գեներալ-մայոր Արկադի Տեր-Թադեւոսյանը:
Ըստ Կոմանդոսի՝ Ադրբեջանը փորձեր է արել առաջխաղացման, սակայն անմիջապես այդ փորձը կասեցվել է:
«Այո, մենք ունենք զոհեր, բայց պետք է հասկանանք, որ սա պատերազմ է, եւ պատերազմն առանց զոհերի չի լինում: Եվ այդ պատերազմն ինչպես այն ժամանակ, այնպես էլ հիմա մենք չէ, որ սկսում ենք: Նախահարձակն իրենք են, եւ ստացվում է, որ մենք կռվում ենք պարտադրված պատերազմում»:
Կոմանդոսը նաեւ հայտարարեց, որ տարիների փորձը հուշում է, որ սխալ է պատերազմի կեսին թողնել մարտական ուղին եւ խոսել դիվանագիտության կամ բանակցությունների լեզվով:
«Դա անիմաստ է, եթե դիմացինդ բանակցությունների լեզվին չի տիրապետում, այդ լեզուն չի հասկանում: Իրենք ի՞նչ են հասկանում դիվանագիտությունից: Որ ասում են դիվանագիտություն, իրենք հասկանում են մորթել, կտրել, ջարդել: Դրա համար այդպես պետք է «բանակցել» Ադրբեջանի հետ՝ զենքի բանակցություններով:
Թե չէ մեր վրա կրակում են, խփում են, մեր անմեղ գյուղացիներին, խաղաղ բնակիչներին մտնում տները մորթում են, իսկ մենք պիտի ընկնենք դիվանագիտական ճամփե՞քը, ԱԺ-ո՞ւմ խոսանք, հայտարարությո՞ւն անենք, գնանք բանակցե՞նք: Ի՞նչ բանակցենք, ո՞ւմ հետ բանակցենք»:
Ըստ Կոմանդոսի՝ այս պատերազմը գոնե միառժամանակ կդադարի, եթե Հայաստանը կարողանա մի քանի նոր տարածքներ վերցնել:
«Իրենք խոսում էին Ստեփանակե՞րտը ռմբակոծելու մասին, այդ ժամանակ համարժեք քայլը պետք է սա լիներ՝ մի երկու հատ նախազգուշական ռակետ ուղարկել Բաքվի վրա: Ստեփանակերտը սովոր է, թող բաքվեցիք էլ զգային դա ինչ է: Թող մի պուճուր էլ բաքվեցիք մտածեն, վախենան, հասկանան, թե դա ինչ է, մտածեն հետեւանքների մասին, բոլորն էլ հարազատ ունեն, երեխեք ունեն: Թե չէ ի՞նչ է նշանակում իրար վրա տանկեր բերել, հետո նստել ասել՝ «Ապեր ջան, արեք բարիշենք»: Ի՞նչ բարիշել, իրենք չեն ուզում բարիշել, իրենք կռիվ են ուզում, պետք է կռվել»: