«Բավարման ենթակա բողոքը` ժամանակին իմ գործունեությունից «վառված» մնացած դատախազը, մերժել է».Այսեր Իսայան

Իմ առողջական վիճակին վերաբերող փաստաթղթերը հետաքննիչի ձեռքով նյութերի միջից անհետացան, հետո քր. գործ հարուցելը չգիտես ինչու մերժվեց

Իրավապաշտպան Այսեր Իսայանը, երեկ հանդես էր եկել բավականին ուշագրավ գրառմամբ, որում մասնավորապես ահազանգում էր. «Ինձ վրաերթի ենթարկելու մասին նյութերի միջից անհետացել են բժշկական հետազոտությունների փաստաթղթերը։ ԴԲՓ է ուղարկվել բժշկական փաստաթղթերի ոչ ամբողջական փաթեթ, իրականացվել է թերի փորձաքննություն եւ… ներկայացրել եմ բողոք։ Ով կարող է ասել փաստաթղթերի անհետանալու պատճառը, եւ գտնվելու հավանական վայրը»:

Երբ եւ ինչ պայմաններում է վրաերթի ենթարկվել իրավապաշտպանը, ի՞նչ միտում է նա տեսնում այս միջադեպի համատեքստում, եւ թե ինչո՞ւ է ակնհայտ հանցագործության հատկանիշներ պարունակող գործը կարճվել, այս եւ այլ հարցերի պատասխանը ստանալու համար եւ հետամուտ լինելով ահազանգում տեղ գտած մտահոգիչ փաստերին, NewsMedia.am-ը կապ հաստատեց իրավապաշտպան Այսեր Իսայանի հետ:

-Պարոն Իսայան, երբ եք վրաերթի ենթարկվել եւ ինչ հանգամանքներում:

-Ուրեմն, նոյեմբերի 11-ի երկեկոյան Սայաթ-Նովա Խանջյան խաչմերուկների անցումի վրա անհայտ անձի կողմից ենթարկվել եմ վրաերթի, որի արդյունքում ստացել եմ մարմնական վնասվածքներ:

-Տվյալ միջադեպը որեւէ կերպ կապում ե՞ք Ձեր գործունեության հետ:

-Անկեղծ ասած ի սկզբանե նման հակվածություն չեմ ունեցել. բայց հետագա զարգացումների, հանգամանքների բերումով սկսեցի խիստ կասկածել, որ այդ վրաերթը ամենեւին էլ պատահական չէր: Նախ իմ առողջական վիճակին վերաբերող փաստաթղթերը հետաքննիչի ձեռքով նյութերի միջից անհետացան, հետո քր. գործ հարուցելը չգիտես ինչու մերժվեց: Ինձ համար առնվազն զարմանալի է, թե ինչու է նման իրավիճակ ստեղծվել,իինչու է քննիչը իմ մարմնական վնասվածքը ֆիքսել, որակել որպես թեթեւ վնասվածք, երբ ես երկու ամսից ավել է պառկած եմ, ու առջեւում էլ ինձ ծանր վիրահատություն է սպասվում:

-Կոնկրետ բժշկական ի՞նչ փաստաթուղթ է անհետացել նյութերից:

-Մարմնական վնասվածքներս հավաստող փաստաթուղթը: Երկրորդ, ես հետաքննիչին հարցնում եմ արդյո՞ք հարցաքննվել է վրաերթի ենթարկողի կողքին նստած ուղեւորը, ստանում եմ պատասխան` ոչ: Հարցին, թե ինչո՞ւ. ասում է` նպատակահարմար չի գտել: Ես կարծում եմ, որ իրավապահները պարտավոր են բացահայտել, թե ոնց եղավ, որ ես «պեշեխոդի» մեջտեղով անցնելիս` կանգնած տեղից մեքենան պոկվեց ու խփեց:

-Դուք վարորդի հետ առերեսվե՞լ եք:

-Ես վարորդին տեսել եմ, խոսել եմ: Վարորդը իրեն դրել էր կատարյալ միամիտի տեղ, բայց նրա երկու ամսվա պահվածքը առնվազն առնետային է:

-Պարոն Իսայան, այս ամենից հետոփաստորեն մերժել են հարուցելու քր գործ, բայց եթե չեմ սխալվում Դուք նաեւ բողոք էիք ներկայացրել Երեւան քաղաքի դատախազություն` վիճարկելով մերժման հիմքերը:Ճի՞շտ է…

-Այո, ես բերել էի բողոք, բայց Երեւան քաղաքի դատախազը, ով նախկինում եղել է Արարատի մարզի դատախազը, ում պահվածքի վերաբերյալ ես հանդես եմ եկել եթերով, մերժել է իմ բողոքը: Այսինքն միանշանակ բավարման ենթակա բողոքը ժամանակին` իմ գործունեությունից «վառված»մնացած դատախազը, մերժել է:

-Որո՞նք են լինելու Ձեր հետագա քայլերը:

-Այս պահին բողոքներ եմ ներկայացրել մի քանի ատյաններ, միանշանակ պահանջելու եմ, եւ հետեւողական եմ լինելու, որ բացահայտվի նախ հանցագործության դրդապատճառը, ինչպես նաեւ ջրի երես դուրս գա գործի միջից փաստաթղթերի անհետացման պատվիրատուն:

Պատրաստեց՝ՆՈՆԱ ԱԴԱՄՅԱՆԸ

NewsMedia.am

Լուրեր Հայաստանից եւ Աշխարհից