«Բելավիա»-ն մինչև հոկտեմբերի վերջ չեղյալ է հայտարարել թռիչքները դեպի Լոնդոն և Փարիզ

Բելառուսական «Բելավիա» ավիաընկերությունը Մեծ Բրիտանիայի և Ֆրանսիայի կառավարությունների որոշման կապակցությամբ այս տարվա մայիսի 25-ից հոկտեմբերի 30-ը չեղյալ է հայտարարում թռիչքները դեպի Լոնդոն և Փարիզ: Այս մասին տեղեկացրել է ավիափոխադրողի մամուլի ծառայությունը, գրում է «ՌԻԱ Նովոստի» գործակալությունը:

«Մեծ Բրիտանիայի և Ֆրանսիայի կառավարությունների որոշման հետ կապված ՝ արգելել «Բելավիա»-ի թռիչքները դեպի Մեծ Բրիտանիա և Ֆրանսիա և հակառակ ուղղությամբ, մենք ստիպված ենք չեղյալ հայտարարել թռիչքները դեպի Լոնդոն և Փարիզ 2021 թվականի մայիսի 25-ից հոկտեմբերի 30-ը», - ասվում է ընկերության կայքում հրապարակված հայտարարության մեջ:

Մամուլի ծառայությունը նշել է, որ Բելավիան «վրդովված է ստեղծված իրավիճակից, որը չի կարող փոխել»:

«Ուղևորները կարող են տոմսերի ամբողջ արժեքը վերադարձնել առանց տուգանքների կամ տոմսի գործողության ընթացքում փոխել մեկնելու ամսաթիվը: Դա անելու համար նրանք պետք է կապվեն տոմսերի գնման վայրի հետ»,-ասվում է հաղորդագրության մեջ:

Հիշեցնենք, որ Ryanair ավիաընկերության Boeing 737-800 օդանավը, որն իրականացնելիս է եղել Աթենք-Վիլնյուս չվերթը, մայիսի 23-ին արտակարգ վայրէջք է կատարել Մինսկում: Օդանավի վայրէջքից հետո օդանավակայանում ձերբակալվել է չվերթի ուղևորներից մեկը` բելառուսական ընդդիմադիր NEXTA թելեգրամյան ալիքի համահիմնադիր Ռոման Պրոտասևիչը: Վերջինիս 15 տարվա ազատազրկում է սպառնում: Նրա նկատմամբ գործ է հարուցվել զանգվածային անկարգություններին մասնակցելու համար: