Բերանը կարած Արմենին խաբեությամբ հոգեբուժարան են տարել.VIDEO

Մոտ 2 շաբաթ առաջ բերանը կարած և աշխատանքը հետ վերադարձնելու ակնկալիքով հացադուլ հայտարարած Արմեն Երանոսյանին խաբեությամբ տարել են հոգեբուժարան:
Նա Fnews.am-ի հետ զրույցում պատմեց, որ անցյալ շաբաթ, կառավարության դիմաց նրան են մոտեցել ոստիկաններ և խոստացել, որ կաջակցեն իրեն` աշխատանքում վերականգնվելու հարցում: Ոստիկանները Արմենին հորդորել են նշված ժամին լինել Կիևյան կամրջի մոտ: Ինչո՞ւ հենց այնտեղ, Արմենն այդ պահին, չի էլ մտածել, նա պարզապես փորձել է հավատալ ոստիկաններին:

«Գնացի Կիևյան կամրջի սկբնամասում կանգնեցի ու սպասում եմ: Կամրջի հենց սկսզբում էի, դաժե մեջտեղն էլ չէի կանգնած, ինձ մոտեցան ոստիկաններ և ասացին, թե ես ուզում եմ ինքնասպան լինել, իմ կյանքին վերջ տալ, բռնեցին ու տարան հոգեբուժարան…էնտեղ ինձ զոռով դեղեր էին տալիս, բերանս բացում` լցնում էին մեջը, սրսկում էին…»,- մեզ հետ զրույցում պատմեց Արմենը:
Նա 4 օր գտնվել է հոգեբուժարանում: Արմենի պատմելով` նրան ժամանակ առ ժամանակ տվել են իր հեռախոսը, որպեսզի խոսի մոր հետ և ասի, թե ամեն իր հետ ամեն ինչ կարգին է: Արմենի հոգեբուժարանում գտնվելու մասին գուցե այդպես էլ ոչ-ոք չիմանար, կամ ուշացված իմանար, եթե պատահաբար, նրան չզանգահարեր Epress.am կայքի լրագրողը: Վերջինս ցանկացել է խոսել Արմենի հետ` պարզելու, թե ինչ վիճակում է նա:

Հենց այդ ժամանակ էլ, երևի թե նախախնամության շնոհիվ, հեռախոսը եղել է Արմենի մոտ: Նա հայտնել է լրագրողին, որ ինքն արեդն 4 օր է գտնվում է հոգեբուժարանում:

Լրագրողն իր հերթին ահազանգել է Հելսինկյան ասոցիացիա: Ահազանգն ստանալուն պես Հելսինկյան ասոցիացիայի նախագահ, փաստաբան Նինա Կարապետյանցը, ասոցիացիայի երկու իրավապաշտպաններ այցելել են Նուբարաշենի հոգեբուժարան: Տնօրեն Արմեն Անանյանը փորձել է նրանց համոզել, թե Արմեն Երանոսյանը գտնվում է անհավասարակշիռ վիճակում, և ցանկացել է իրեն նետել Կիևյան կամրջից:
Արմեն Երանոսյանի խոսքով, երբ հոգեբուժարանում իմացել են, որ իր հետևից իրավապաշտպաններ են եկել, հաստատության հոգեբույժ Վազգեն Առաքելյանը ստիպել է, իրեն հրաժարվել իրավապաշտպաններից:
«Ես չհամաձայնվեցի, ինձ զոռով սրսկեցին, թմրեցի, հետո դեղեր խմացրեցին…»,-ասաց Արմեն Երանոսյանը:

Իրավապաշտպանների և հոգեբուժարանի տնօրենի միջև երկար զրույցից հետո, Երանոսյանին դուրս են գրել հոգեբուժարանից: Արմենը շարունակում է պահանջել, վերականգնել իր  աշխատանքում: Նա վարչապետին հանդիպելու  ակնկալիքով դարձյալ կառավարության շենքի մոտ էր: Նրա հետ էին նաև Հելսինկյան ասոցիացիայի ներկայացուցիչները, ովքեր հսկում էին, որ Արմենին դարձյալ որևէ մեկը չմոտենա: Նրանց խոսքով, երբ Արմենին այցելել են հիվանդանոցում, նա շատ թույլ էր իրենց զգում:
Հիշեցնենք, որ Արմեն Երանոսյանը Վարդենիսից է: 2 շաբաթ առաջ 40-ամյա տղամարդը, իրեն աշխատանքից հեռացնելու համար, ի նշան բողոքի, կարել էր բերանը և հայտարարել հացադուլ: Նա աշխատում էր Վարդենիսի ոսկու հանքում: Ամուսնացած չէ: Ապրում է մոր և եղբոր հետ:

Ա. Սահակյան