ԲՀԿ-ական Էլինար Վարդանյանը Մարալիկ քաղաքում հայտնաբերել է, որ...

Արդեն որքան ժամանակ է թեժ խոսակցություններ ու քննարկումներ են գնում էլէկտրաէներգիայի սակագնի թանկացման հետ կապված: Այսօր անգամ խորհրդարանական լսումներ էին կազմակերպվել այդ թեմայով: Քննարկումն, իհարկե, թեժ էր, կարծիքները խիստ հակասական, պատճառաբանությունները՝ անտրամաբանական: Փաստորեն որոշների սխալ կառավարման պատճառով առաջացած խոշոր ճեղքվածը, պետք է փակեն ՀՀ-ում բնակվող քաղաքացիները, դե իսկ հենց այդ որոշներն էլ բնականաբար կիսաքամված ժողովրդի հաշվին կապրեն չաղ ու բախտավոր: Էլէկտրաէներգիայի սակագնի թանկացումը, թե ի՞նչ նոր հետեւանքներ կբերի հասարակության շրջանում, Fnews.am-ը ճշտեց ԱԺ պատգամավորներից.

ԱԺ ԲՀԿ խմբակցության պատգամավոր Էլինար Վարդանյան.

-Նախապես չեմ կարող ինչ-որ կանխատեսումներ անել, բայց այն, որ սակագների բարձրացումը հիմնավորված չէ եւ այսօրվա լսումներն էլ որեւէ կեպով չհամոզեցին, որ դա է միակ լուծումը, ես պարզապես կարող եմ ասել մեր մոտեցումը, որ սա անընդունելի է: Օրինակ՝ գազի գնի սակագնի բարձրացման հետ կապված այնքան անհասկանալի խնդիրներ կային, որ ստեղծվեց հանձնաժողով: Հանձնաժողովի աշխատանքի արդյունքներին դեռ ծանոթ չեմ, բայց ենթադրում եմ, որ ընթացիկ եզրակացության մեջ, մեզ համար եւս հայտնագործություններ կլինեն: Եթե անմիջապես դրա հետ կապենք էլէկտրաէներգիայի թանկացումը, ապա պետք է նշենք, որ գազի գնի թանկացման հետ կապված, էլէկտրաէներգիայի գնի թանկացում եղավ եւ ինձ համար առավել քան տարօրինակ է, երբ էլէկտրաէներգիայի թանկացումը մեկ տարվա մեջ կարող է կազմել 40%:
Բնականաբար բնակչության եւ Հայաստանի Հանրապետության քաղաքացիների սոցիալական վիճակն ավելի է վատանալու,եւ թե դա ինչ արդյունքներ է հանգեցնում մենք այսօր տեսնում ենք՝ աղքատություն, արտագաղթ… Այս ամենի արդյունքներն իրենց երկար սպասել չեն տա: Մեր երկրում արտագաղթն այնքան է ուժգնացել, որ ես այլեւս չեմ կարող տեսնել, էլ ինչ կարող ենք անել, որ մարդիկ արտագաղթեն, որովհետեւ իրականում օրեցօր ալիքն ուժգնանում է: Մի օրինակ բերեմ.ուրբաթ օրը Մարալիկ քաղաքում էինք, ուսումնասիրում էինք մանկատան շրջանավարտներին տրամադրված բնակարանների սոցիալական պայմանները եւ այդ ժամանակ մենք հայտնաբերեցինք, որ այդ սաների մեծ մասը պարզապես չուներ ո՛չ գազ, ո՛չ էլէկտրաէներգիա, որովհետեւ ձմեռվանից այս կողմ չէին կարողացել վճարել ծախսած գումարները:

ԱԺ ՀՅԴ խմբակցության պատգամավոր Արծվիկ Մինասյան. 

-Չեմ կարող ասել, մի բան է հստակ. անկախ նրանից, բունտ կառաջանա թե ոչ` սա խիստ բացասական ազդեցություն կունենա երկրի սոցիալ-տնտեսական կյանքի վրա: Ոչ միայն քաղաքացիների կենսամակարդակի, այլ նաեւ տնտեսության աճի վրա, իսկ դա նշանակում է` նոր գործազրկություն, աշխատատեղերի կրճատում եւ այլն, նաեւ` արտագաղթ:
Ցանկացած պարագայում, ես պայքարի կողմակից եմ, անկախ նրանից վերջնական արդունքն ինչ է լինելու: Եթե չկա պայքար, չկա նաեւ առաջընթաց: Իսկ եթե չկա առաջընթաց, ապա չկա նաեւ վիճակի փոփոխման հնարավորություն, հետեւաբար բոլոր դեպքերում ես կողմնակից եմ պայքարելուն, պնդելուն, պահանջելուն, առաջադրելուն»:

Սոսե  Չանդոյան