ԲՀԿ-ն գնաց ինքնամաքրման ճանապարհով

Ինչքան էլ որ խորհրդարանական ընդիմությումը շարունակում է պնդել, որ ՀՀ իշխանությունների ճնշման ներքո է ԲՀԿ նախագահ Գագիկ Ծառուկյանը հրաժարվել իր բռնած  քաղաքական կուրսից եւ ինչքան էլ, որ որոշ  ընդիմադիրներ բարձրաձայնում են թե ՀՀԿ-ի ճնշումներից հետո է միայն ի դեմս Ծառուկյանի դադարեցվել իշխանափոխության ծրագիրը, այդուհանդերձ խորհրդարանական մեծամասնությունը պնդում է, որ վաղուց պետք է ԲՀԿ-ն գնար ինքնամաքրման ու զտման ճանապարհով, քանի որ այլ կերպ մեծ քաղաքականության մեջ դերակատարում ունենալն ուղղակի անհնարին գործ էր դառնում: 

Ավելին, ՀՀԿ-ականներից շատերը  մինչ օրս  էլ հավաստիացնում են, որ անհանդուրժող են բոլոր այն երեւույթների հանդեպ, որոնք դեմ են քաղաքակրթության կանոններին: Նկատելով, որ.«Քաղաքականությունը պետք է լինի միայն գրագետ մարդկանց մենաշնորհը, եւ որ քաղաքական ավանտյուրիսները իրենց կեղծ փրկիչների տեղ չպետք է դնեն:

ԱԺ ՀՀԿ խմբակցության պատգամավոր Կարինե Աճեմյանը նույնպես, Fnews.am-ի հետ զրույցում ընդգծեց, որ.
-Ես առհասարակ կողմ եմ կոնկրետության եւ որոշակիության. այսինքն գտնում եմ, որ քաղաքական ուժը  հստակ պետք է իր ուղղվածությունն ու դիրքն ունենա քաղաքական դաշտում:
-Տիկին Աճեմյան ընդիմությունը շարունակում է կարծիք հայտնել, որ իշխանությունները վախենում են քննադատությունից ու ներքաղաքական իրավիճակի շուրջ գնահատականներ հնչեցնելուց: Ի՞նչ կասեք սրա վերաբերյալ:

-Մենք երբեք չենք վախեցել քննադատությունից ու ընդիմությունից, քանի որ ցանկացած նորմալ երկրում ե'ւ ուժեղ իշխանություն պետք է լինի, ե'ւ ուժեղ ընդիմություն: Բայց ապակառուցողական, ծայրահեղ ելույթներով հանդես եկող ուժը պետք է հստակ դիրքորոշում ունենա: Ասելիքս այն է, որ ԲՀԿ-ի   մանեւրելու այսպես ասած սկզբունքները իրենց բերեցին այս իրավիճակին: Այնուամենայնիվ ես կարծում եմ, որ մենք կկարողանանք ելքեր գտնել եւ հաջողությամբ աշխատել:
-Տիկին Աճեմյան ստացվում է, որ ՀՀԿ-ն հստակություն մտցրեց ԲՀԿ-ի օրակարգում... 

-Կարելի է նաեւ այդպես ասել, որովհետեւ եթե քաղաքական ուժը չգիտի թե ուր է գնում, եւ ինչպես է առաջ շարժվում, ապա երեւի ինչ-որ ձեւով պետք էր նրան ճիշտ ուղղու վրա դնել: Քաղաքականությունը ճիշտ է դիվանագիտություն, ինչու չէ նաեւ մանեւրել է ենթադրում, բայց ես կարծում եմ, որ դրանք չպետք է անցնեն քաղաքակրթության սահմանները: Շփման մեջ չպետք է այդքան շատ անհստակություններ լինեն: Կամ այս կողմում ես, կամ այն կողմում: 

-Իսկ կիսում ե ՞ք այն կարծիքը, որ ԲՀԿ-ն գնաց ինքնափոշիացման ճանապարհով, եւ որ շուտով  կնախանաձի ՕԵԿ-ին, որին հեգնում էր նրա վարած քաղաքականության ու ներկայիս ընդիմադիր կեցվածքի համար:

-Ես կասեին, որ ԲՀԿ-ն գնաց ինքնամաքրման ճանապարհով: Շատ լավ կլիներ, որ նրանք հետեւություններ անեին եւ վերակազմավորվեին,  ճշտելով  իրենց հետագա անելիքներն ու քաղաքական օրակարգը: