ԲՀԿ-ն հանձնաժողովի նիստում տարոնական է, ավագանու նիստում՝ լևոնական.

«Հրապարակ» թերթը գրում է. «Երեկ քաղաքապետարանում տեղի է ունեցել աննախադեպ իրադարձություն. Երևանի ավագանու ԲՀԿ-ական ֆրակցիան ոչ միայն դեմ է քվեարկել Տարոն Մարգարյանի` Երևանի քաղաքապետարանի թվով 1782 հաստիքային միավորների ամսական աշխատավարձը միջինը 15%-ով բարձրացնելու որոշմանը, այլև կեսից բոյկոտել է ավագանու նիստը: ԲՀԿ-ի արարքը զարմանքի տեղիք չէր տա, «Բարև, Երևանի» գործունեության պես օրինաչափ կլիներ, եթե ԲՀԿ-ի՝ հեղափոխական կազմակերպություն դառնալուց հետո ավագանու ԲՀԿ-ական անդամները Տարոն Մարգարյանի բոլոր որոշումներին ընդդիմանային ու հրաժարվեին դակել դրանք: Այս խմբակցությունն իր մեջ այնքան ուժ չգտավ, որ անգամ դեմ չքվեարկեց Անաստաս Միկոյանի արձանի տեղադրմանը, երբ ողջ երկրով մեկ բողոքի ալիք էր բարձրացել, և դրա շնորհիվ գործընթացը տապալվեց: ԲՀԿ-ն այս ամբողջ ընթացքում հազվադեպ է դեմ արտահայտվել քաղաքապետի որոշումներին, ուստի երեկ տեղի ունեցածն ուշագրավ է՝ ինչո՞ւ հանկարծ որոշեցին դեմ քվեարկել սոցիալական մի ծրագրի՝ աշխատավարձերի բարձրացմանը, այն դեպքում, երբ ԲՀԿ-ն հենց ցածր աշխատավարձերի ու աղքատության շուրջ է կառուցում իր հրապարակային քննադատությունը: Իսկ այս որոշումը ոչ թե Տարոն Մարգարյանին ու իր տեղակալներին էր վերաբերում, այլ հանրային աշխատողներին՝ գրադարանների, մանկապարտեզների աշխատակիցներին, որոնք շատ ցածր են վարձատրվում: Չի բացառվում, որ նրանց հրահանգվել է հեղափոխական պահվածք դրսևորել ավագանու նիստերի ժամանակ, և նրանք գրոհել են՝ առանց երկար-բարակ մտածելու: Ուշագրավն այն է, որ ավագանու նիստին դեմոնստրատիվ դեմ քվեարկելուց ու նիստը բոյկոտելուց առաջ այս նույն ֆրակցիան հանձնաժողովների քննարկումների ժամանակ կողմ է քվեարկել որոշմանը և առարկություններ չի հայտնել:

«Բյուջետային քննարկումներն սկսվել են ավելի քան 1 ամիս առաջ, նիստեր ենք ունեցել քաղաքապետարանին կից հանրային խորհրդի նիստում, բոլորին մասնակցել են երկու խմբակցությունները, և ես մանրամասն ներկայացրել եմ բյուջեի աշխատավարձերի բարձրացման անհրաժեշտությունը, հարցը, թե որքան է կազմում ու ինչպես է լինելու, բայց որևէ առարկություն չի եղել ԲՀԿ-ի կողմից, աշխատավարձերի հարցի ներկայացման մասով գոնե մի հարց չի բարձրացվել, և քաղաքապետարանի աշխատակիցների աշխատավարձերի մասով չի եղել, որի որոշման իրավասությունն ավագանունն է, և ընդհանուր բարձրացմանը, որը նախատեսվում է բյուջեով»,-մեզ հետ զրույցում ասաց քաղաքապետի առաջին տեղակալ Վահե Նիկոյանը:

«Բարև, Երևանից» մեզ հետ զրույցում պնդեցին, որ իրենք ի սկզբանե դեմ են եղել և նիստին էլ դեմ են քվեարկել: ԲՀԿ-ի հակասական վերաբերմունքը շարունակվել է նաև ավագանու նիստի ժամանակ, երբ հարցը դրվել է քվեարկության: Ֆրակցիայի որոշումը կարծես բոլորի սրտով չի եղել, և ոչ բոլորի ձեռքերն են վստահ վերև բարձրացել՝ ի պաշտպանություն քաղաքային բյուջեի: Գրանցվողների և քվեարկողների թվաքանակը տարբեր է եղել: Ժառանգականները, տեսնելով նրանց տարօրինակ պահվածքը, պահանջել են կրկին քվեարկել: Տարոն Մարգարյանը ստիպված է եղել երկրորդ անգամ քվեարկություն կազմակերպել՝ ակնհայտ ծաղրելով ԲՀԿ-ականների վախվորած վարքը: «Ամաչելով եք դեմ քվեարկում, մի քիչ բարձր պահեք, դուք 7 հազար ընտանիքի դեմ եք քվեարկում»,-հեգնական ժպիտով դիմել է Տարոն Մարգարյանը:

Անկախ ամեն ինչից, արձանագրենք, որ այս «նյու սթայլը» բավականին ոգևորող է, հուսադրող, որ քաղաքի կառավարման մարմնում ԲՀԿ-ն այսուհետ հակատարոնական դիրքորոշումներ կորդեգրի: Կասկածների տեղիք է տվել Տարոն Մարգարյանի «7 հազար ընտանիք» ձևակերպումը, մինչդեռ տեղեկանքում միայն քաղաքապետարանի թիվն է ներկայացված եղել: Նիկոյանը մեզ հետ զրույցում ասաց, որ 7 հազարը վերաբերում է բյուջեով նախատեսված ամբողջ հաստիքացուցակին, որի մի մասը՝ գրադարաններ, մանկապարտեզներ, հաստատվում է միայն քաղաքապետի որոշմամբ, բայց բյուջեի մասով վերջնական որոշումը կայացնելու է ավագանին, այնպես որ, դեկտեմբերին սպասվող նիստն ավելի թեժ է լինելու:

Մանրամասները՝ թերթի այսօրվա համարում