Բնականաբար ծառը պետք է կտրեն, որ շենք կառուցեն

Չնայած նրան, որ այսօր ՀՀ Ազգային ժողովի <հյուրերն> էին ՀՀ կառավարության ներկայացուցիչները, այնուամենայնիվ մթնոլորտը սովորականի պես թեժ չէր՝ բոցաշունչ խոսքեր եւ սուր քննադատություններ միմյանց գործելաոճի նկատմամբ չհնչեցին: Որոշ նախարարներ ԱԺ-ում ներկա չգտնվելու պատճառով անգամ <հարգելի բացակա> ստացան ԱԺ նախագահ Գալուստ Սահակյանի կողմից: Դե իսկ ներկաներից բնապահպանության նորաթուխ նախարարին Fnews.am-ը դիմեց կոնկրետ խնդրի վերաբերյալ հստակ հարցադրումներով: Խոսքը մեր նախկին հրապարակումներից մեկի՝ Նոր Նորքի 1-ին զանգվածի Լվովյան 2 հասցեի կանաչ տարածքի ծառահատումների եւ դրանց փոխարեն էլիտար շենքի կառուցման մասին էր:

Հիշեցնենք, որ համայնքում շրջանառվող համառ լուրերի համաձայն տվյալ շենքի սեփականատերը Միքայել Բաղդասարովն Է, ում թուրը ներկայումս փաստորեն <<տակից>> աջ է կտրում: Ինչեւէ, հասկանալու համար, թե ինչպե՞ս է վերաբերում ՀՀ բնապահպանության նախարար Արամայիս Գրիգորյանը նման խնդիրներին, դիմեցինք հենց նրան: Հայտնի <հերոս-պատգամավոր> Արայիկ Գրիգորյանի՝ <<Ավշարի>> Արայիկի եղբայրը չնայած չափից դուրս սթափ եւ զգաստ վիճակում էր գտնվում, այնուամենայնիվ իր կողքի աղջնակին, ով ներկայացավ որպես մամուլի խոսնակ, հրահանգել էր ձայնագրել իր յուրաքանչյուր խոսքը: Հավանաբար նախարարի սիրտը դող է ընկել հարազատ եղբոր՝ Ազգային ժողովում կատարած վերջին <գաստրոլներից> հետո: Այնուամենայնիվ, նախարարի պատասխանը խնդրի վերաբերյալ հետեւյալն էր. <Եթե էլիտար շենք են կառուցում, ծառի վրա կարո՞ղ են էլիտար շենք կառուցել: Բնականաբար ծառը պետք է կտրեն, որ շենք կառուցեն, եթե դրա օրինական թույլտվությունը ունեն>:

Փաստորեն նորաթուխ բնապահպանության նախարարը իր <հարբած> եղբորից խարիզմատիկ դեմք դուրս եկավ: Նա սթափ է, բայց դեռ վերջինիս մտահորիզոնը էլիտար շենքերի քառակուսների գծագրերի մեջ է տեղավորվում: Եւ կարծում եմ այլեւս ավելորդ մտածել այն մասին, թե ինչպես է ՀՀ-ի բնությունը <ծաղկելու ու կանաչելու> այս նախարարի օրոք…

Սոսե  Չանդոյան