«Բոլորն էլ գիտեն, ով ու ում պատվերով են սպանել տղայիս, բայց»...

Ութ տարի առաջ իր բնակարանի դիմաց դարանակալ մարդասպանի կրակոցներից զոհվեց ՀՀ փոխոստիկանապետ, ոստիկանության գնդապետ Գեւորգ Մհերյանը: Այսքան տարի հետո գործը դեռ մնում է չբացահայտված: "Ոչ մի շարժ չկա, թեեւ բոլորն էլ գիտեն, ով ում պատվերով են սպանել տղայիս, բայց տարօրինակ կերպով ութ տարի շարունակ լռում են: Ամեն տարի հույս եմ տալիս ինձ, որ կբացահայտվի ու մեղավորները կպատժվեն, բայց ոչ մի տեղաշարժ, ոչ մի քայլ առաջ",-Fnews.am-ի հետ զրույցում ասաց սպանված փոխոստիկանապետի հայրը` Պետրոս Մհերյանը:

Որդեկորույս հոր խոսքով.
-Քննվող գործի ընթացքից էլ տեղյակ չեմ, ոչինչ չեն ասում, անընդհատ ասում են համբերի, սպասի, բայց ախր ինչքան: Երբ բոլոր փաստերն ու ապացույցները կան, չգիտեմ ինչին են սպասում:

Հիշեցնենք, որ փոխոստիկանապետ Գեւորգ Մհերյանը սպանվել է Երեւանի Բարբյուս փողոցի 65 շենքի (Կիեւյան կամրջի հարեւանությամբ գտնվող "Օլիմպիա" մոթելի դիմաց) 7-րդ հարկի միջանցքում` վերելակից դուրս գալուց հետո։ Մհերյանի վրա արձակվել է ութ կրակոց, որոնցից հինգն են նրան դիպել։ Իրավապահները դեպքի վայրում հայտնաբերել են 9 մմ տրամաչափի 8 պարկուճ եւ չորս գնդակ։