Բոլորս կողմ ենք, որ Կարեն Կարապետյանը կարողանա շարունակել պաշտոնավարել. Գալուստ Սահակյան

Գործող վարչապետը բավական հաջողակ է և մենք բոլորս կողմ ենք, որ նա կարողանա շարունակել պաշտոնավարել: Tert.am-ի հետ զրույցում ասաց ԱԺ ՀՀԿ խմբակցության պատգամավոր Գալուստ Սահակյանը` խոսելով վարչապետ Կարեն Կարապետյանի հայտարարության մասին, թե ինքը պատրաստ է 2018թ.-ից հետո էլ պաշտոնավարել, ինչը քաղաքական շրջանակները դիտարկում են որպես ինքնաառաջադրում:

Այս առնչությամբ Tert.am-ը հարցրեց՝ արդյոք ՀՀԿ-ն կսատարի՞ Կարապետյանի թեկնածությունը: Գալուստ Սահակյանը պատասխանեց, որ հարցը պետք է տալ այդ խնդիրն առհասարակ առաջ քաշողներին, որովհետև իշխող կուսակցությունը նման հարց չի քննարկել:

«2018թ.-ի համար դեռ երկար ժամանակ կա, իսկ վարչապետին ընտրում է քաղաքական թիմը: Այնպես չէ, որ հարցը կարելի է այսօր դնել... Իհարկե, մենք բոլորս էլ կարծում ենք, մեզ համար վարչապետը բավական հաջողակ է և, բնականաբար, բոլորս կողմ ենք, որ նա կարողանա շարունակել: Բայց քաղաքական թիմն այսօր որոշում դեռևս չունի»,- ասաց Գալուստ Սահակյանը:

Պատգամավորը շեշտեց, որ կառավարության ամբողջ ծրագիրը կազմվել է ՀՀԿ կողմից և անկախ նրանից՝ ով կլինի վարչապետը, ծրագիրը շարունակվելու է իրականացնել: Միաժամանակ, Սահակյանը չթաքցրեց, որ կարևոր է, թե ով կշարունակի իրականացնել այդ ծրագիրը, բայց դեռևս վաղ է խոսելն այդ մասին:

«Անձին վարչապետ նշանակելու համար տարբեր փուլեր կան, որոնցից մեկն էլ 2018թ.-ն է: Այնպես չէ, որ անձը ինձ դուր է գալիս, դրա համար վարչապետ պետք է լինի կամ էլ մարդիկ կան, որ ծնվում են վարչապետ, նախագահ դառնալու համար»,- նշեց Գալուստ Սահակյանը:

Իսկ հարցին՝ կա՞ Կարեն Կարապետյանին այլընտրանք, արդյոք քննարկվում է այն հարցը, որ եթե նա չշարունակի պաշտոնավարել, ապա ով կշարունակի, Սահակյանը պատասխանեց. «Նման խնդիրները քաղաքական որոշում ունենալ չեն կարող: Դա կարող է ինչ-որ մարդկանց մեջ քննարկվել»:

Tert.am