Բողոքի ակցիաներ էլ կանենք, միայն թե ճշմարտությունը բացահայտվի

ՀՀ քննչական կոմիտեից Fnews.am-ին տեղեկացրեցին, որ hունվարի 4-ին «Արմավիր» ՔԿՀ-ում 21 տարեկան Անզոր Կարապետյանի մահվան փաստով հարուցվել է քրեական գործ` ՔՕ 110 -րդ հոդվածի 1-ին մասի հատկանիշներով (ինքնասպանության հասցնելը): Հունվարի 11-ին ինքասպան եղած երիտասարդի հարազատները դիմել են Հելսինկյան քաղաքացիական ասամբլեայի Վանաձորի գրասենյակ: «Ընկերս ինքասպանություն չէր կարող գործել, հաստատ նրան այնտեղ ինքասպանության են դրդել, մարմնի վրա բռնության հետքեր կային: Կարծում ենք, որ այնտեղ նույնիսկ իրեն ծեծի են ենթարկել, ճնշել են դրա համար էլ նման քայլի է դիմել»,-Fnews.am-ի թղթակցի հետ զրույցում  ասաց ինքասպանություն գործած երիտասարդի ընկերը` Հարությունը: Ընկերը տեղեկացրեց, որ իրենք մինչև վերջ պայքարելու են, որպեսզի բացահայտվի ճշմարտությունը: «Պետք է բոլոր մեղավորերը պատասխանատվության ենթարկեն, մենք ամեն քայլի պատրաստ ենք, պետք լինի բողոքի ակցիաներ էլ կանենք, միայն թե ճշմարտությունը բացահայտվի»,-ասաց Անզորի ընկերը;
«Արմավիր» ՔԿՀ-ից էլ հայտնեցին, որ ինքնասպանություն  գործած անձը   2015 թ. դեկտեմբերի 31-ին Արմավիր քաղաքում մասնակցել է ծեծկռտուքի, ինչից հետո ներկայացել է ոստիկանություն, նրան ձերբակալել են, այնուհետեւ 2016 թ. հունվարի 3-ի երեկոյան դատարանի որոշմամբ կալանավորել եւ տեղափոխել են  «Արմավիր» ՔԿՀ: