Բուդաղյանի և այլոց գաղտնալսված հեռախոսազրույցները «զրո ապացույց են պարունակում»

Մինչ Սյունիքի մարզպետ Սուրիկ Խաչատրյանի դեմ մահափորձի գործով ձերբակալությունները Ազգային անվտանգության ծառայությունը գաղտնալսել է չորս կասկածյալների հեռախոսազրույցները։ Ինչպես «Ազատությանը» փոխանցեց Խաչատրյանի մահափորձը պատվիրելու մեջ մեղադրվող Արա Բուդաղյանի փաստաբան Հայկ Ալումյանը, նախաքննական մարմինն ու դատարանը ազատազրկման որոշում կայացնելու համար հիմնվել են հենց հեռախոսազրույցների վրա, որոնցում, սակայն, որևէ բառ չկա ո՛չ Սուրիկ Խաչատրյանի, ո՛չ մահափորձի, ո՛չ էլ առհասարակ այդ թեմայի մասին։

Փաստաբանը, ով պատրաստվում է հրապարակել այդ զրույցների բովանդակությունը, հայտարարեց, որ դրանք զրո ապացույց պարունակող կենցաղային խոսակցություններ են, նույն հաջողությամբ կարող են մարզպետի սպանությունը պատվիրելու մեջ մեղադրել ցանկացած քաղաքացու:

«Կարելի էր նույն հաջողությամբ ասել, որ էդ խոսակցությունների ընդհանուր վերլուծությունը թույլ է տալիս մտածելու, որ Հայկ Ալումյանն էլ է էնտեղ եղել, ցանկացած մեկը, հասկանո՞ւմ եք: Ոչ մի բան՝ ո՛չ ուղղակի, ո՛չ անուղղակի, ո՛չ չափազանց կասկածամիտ մարդու տեսանկյունից, չի կարող հիմք դառնալ՝ մտածելու, որ էդ հեռախոսային խոսակցությունները գոնե ինչ-որ կերպ կապ ունեն Սուրիկ Խաչատրյանի դեպքի հետ», - «Ազատության» հետ զրույցում ասաց Ալումյանը՝ մանրամասնելով․

- «Ոչ միայն Սուրիկ Խաչատրյանի անունը չի տրվում, ոչ միայն էնպիսի խոսակցություն է, որ կարելի է մտածել, որ ինչ-որ կոդավորված բաներ են խոսում, չէ, ընդհանրապես՝ էդ խոսակցությունը որ տեսանկյունից ուզում եք վերլուծեք, ինչ աստիճանի կասկածամիտ մարդ ուզում է դա վերլուծի, ասում եմ՝ ընդհուպ պարանոյիկին էլ որ տաք վերլուծի, ինքը չի կարող դրանից ենթադրել, որ էդ խոսակցությունը կարող է ինչ-որ կերպ առնչվի Սուրիկ Խաչատրյանի դեպքի հետ»:

Այնինչ, ընդգծեց փաստաբանը, «դա միակն ապացույցն է էսօր, որ Արա Բուդաղյանը առնչվում է էդ դեպքին»: «Այսինքն, գոյություն չունի ապացույց, թղթի կտորներ՝ 15 թուղթ», - հավելեց նա:

Հիշեցնենք՝ մայիսի 20-ին հայտարարվեց, որ Կապան - Գորիս ավտոճանապարհին կրակահերթեր են արձակվել մարզպետի ավտոմեքենայի վրա, որի մեջ այդ պահին եղել են Սուրիկ Խաչատրյանը, նրա օգնականը և վարորդը: Արա Բուդաղյանն ու երեք այլ անձինք ձերբակալվեցին մոտ մեկուկես ամիս անց․ Հենրիկ Ավագյանին առաջադրվեց մահափորձն իրականացնելու և ապօրինի զենք կրելու, Գարեն Աթաջանյանին ու Վիտալի Մինասյանին՝ մահափորձին աջակցելու և ապօրինի զենք կրելու մեղադրանքներ։

Հայկ Ալումյանի փոխանցմամբ՝ մեղադրանքում նշված է, որ Արա Բուդաղյանը գումար է տվել Սուրիկ Խաչատրյանի մահափորձն իրականացնելու համար, մինչդեռ վկայակոչվող հեռախոսազրույցում, ընդհակառակը, խոսվում է Բուդաղյանից որոշ ժամանակ առաջ պարտքով վերցված 200 հազար դրամը վերադարձնելու մասին:

«Արա Բուդաղյանի հետ նրանցից մեկը խոսում է, ասում է՝ «կլինի՞՝ փողը մի քիչ ուշ բերեմ քեզ տամ, ամսվա վերջ բերեմ տամ», 200 հազար դրամ մոր ծնունդի համար Արա Բուդաղյանից պարտք էր վերցրել՝ մի մասը տվել էր, մի մասն էլ չէր կարողանում տալ, զանգել էր, ասում էր՝ «կլինի՞ ամսվա վերջին բերեմ տամ», նա էլ ասում է՝ «դե մի քիչ արագացրու, աշխատիր ամսվա վերջին անպայման բերես տաս»:

Մանրամասները՝ սկզբնաղբյուր կայքում