«Բունտի մասին խոսք անգամ լինել չի կարող».Գոռ Ղլեչյան

«Վարդաշեն» քրեակատարողական հիմնարկում իրավիճակը ամբողջությամբ վերահսկելի է. բոլորն առանձնացված խմբերում են, բժիշկների վերահսկողության տակ,-Fnews.am-ի հետ զրույցում ասաց ՔԿՀ տեղեկատվության եւ հասարակայնության հետ կապերի վարչության պետ Գոռ Ղլեչյանը, պատասխանելով մեր այն հարցին, թե այս պահի դրությամբ ի՞նչ իրավիճակ է տիրում «Վարդաշեն» քրեակատարողական հիմնարկում:

Ճշտմանը, թե ինչքանո՞վ են տեղին խոսակցություններն այն մասին, որ քրեակատարողական հիմնարկում, այնուամենյանիվ բունտի նոր ալիք կարող է բարձրանալ, Գոռ Ղլեչյանը բացառեց բունտի հասունացումը, փոխանցելով հետեւյալը. «Բունտի մասին խոսք անգամ լինել չի կարող»:

Հիշեցնենք, որ «Վարդաշեն» քրեակատարողական հիմնարկում արդեն չորրորդ օրն է, ինչ Վոլոդյա Ավետիսյանը շարունակում է հացադուլը:

Թեմայի առնչությամբ պատգամավոր Նիկոլ Փաշինյանն էլ ֆեյսբուքյան իր էջում կատարել էր հետեւյալ գրառումը, տեղեկացնելով, որ.«Տեղեկություններ կան, որ մեկ տասնյակ դատապարտյալներ նույնպես դիտարկում են հացադուլին միանալու հնարավորությունը: Պատճառը մեկն է. պատժի կրումից պայմանական վաղաժամկետ ազատ արձակման մեխանիզմը Հայաստանում դե ֆակտո չի գործում, համապատասխան հանձնաժողովները որևէ կերպ չեն հիմնավորում իրենց մերժումները և անկախ հանձնաժողովի՝ պատժի կրումից պայմանական վաղաժամկետ ազատելուց մերժման որոշումները ՀՀ օրենսդրությամբ բողոքարկման ենթակա չեն: Սա նշանակում է, որ համապատասխան հանձնաժողովները որոշումներ կայացնում են ոչ թափանցիկ, միայն իրենց հայտնի սկզբունքներով, ինչը առաջ է բերում ազատազրկման դատապարտված անձանց և նրանց հարազատների հասկանալի բողոքը»: 

Տաթեւիկ Աբրահամյան