Ծառուկյանն այսօր շատ ավելի երջանիկ է, քան երբ կուսակցության նախագահն էր (Video)

1in.am-ը գրում է. – Պարոն Մանուկյան, Դուք հիմա «Բարգավաճ Հայաստան» կուսակցությա՞ն, թե՞ ավելի շատ Գագիկ Ծառուկյանի հետ եք:

– Ես կուսակցության գործունեության մեջ ունեցել եմ իմ դերակատարումը եւ ԲՀԿ պատգամավոր եմ դարձել պարոն Ծառուկյանի հորդորով: Պարոն Ծառուկյանը իմ ընկերն է, իմ ընկերն է մնում եւ իմ ընկերն է լինելու մինչեւ վերջ:

– Իսկ խմբակցության հետ աշխատո՞ւմ եք: Կիսո՞ւմ եք այն դիրքորոշումը, ինչն ունի ԲՀԿ խմբակցությունը:

– Ընդհանրապես խմբակցությունը բազմակարծիք հավաքատեղի է: Բոլորի կարծիքները կարող են տարբեր լինել, բայց վերջում գտնում ենք ճիշտ կարծիքը, ճիշտ մոտեցումները եւ շարժվում ենք ճիշտ ուղիով՝ ընդհանուր կարծիքը հաշվի առնելով: Անհատական կարծիքներն այդտեղ ոչ միշտ են դեր խաղում:

– Երբ Գագիկ Ծառուկյանը հեռացավ ԲՀԿ-ից ու քաղաքականությունից, լուրեր էին շրջանառվում, թե Դուք կուսակցության հետ խզելու եք Ձեր հարաբերությունները, ավելին՝ աշխատելու եք կուսակցության դեմ: Տեղեկություններ էին շրջանառվում, որ Դուք հրահանգում եք ԲՀԿ-ի գրասենյակներից հավաքել գույքը:

– Նման բան երբեք չի եղել եւ չէր էլ կարող լինել: Նրանք, ովքեր գիտեն պարոն Ծառուկյանին ու նաեւ ինձ, բոլորն էլ համոզված են, որ նման բան երբեք չէր կարող լինել: Դրանք հերյուրանքներ են: Մի քանի անգամ այդ հարցը պարզաբանվել է: Ես անգամ չգիտեմ, թե այդ հարցը որտեղից բարձրացավ: Ես եւ՛ կուսակցության, եւ՛ խմբակցության անդամ եմ: Այնպես որ, մնալու եմ կուսակցությունում, որովհետեւ միշտ չէ, որ մարդ իր կարծիքով ու համոզմունքներով է առաջնորդվում: Դեպքեր են լինում, երբ շրջապատի կարծիքն էլ ես հաշվի առնում եւ հանուն շրջապատի կարող ես ինչ-որ տեղ քեզ զոհաբերես: Ես ինքս ժամանակին կարող է մտածում էի դուրս գալու մասին, բայց հանգամանքներն այնպես ստացվեցին, որ ես պետք է մնամ ու շարունակեմ իմ գործը:

– Ի՞նչ հանգամանքներ փոխեց Ձեր այդ մտադրությունը:

– Ընդհանուրի հորդորն ու մեր զրույցները:

– Կարծիք կա, որ ԲՀԿ-ում կա երկու թեւ՝ պատգամավորներ կամ շարքային անդամներ, ովքեր մնալով կուսակցությունում՝ շարունակում են հավատարիմ մնալ Գ. Ծառուկյանին: Մի մասն էլ Գ. Ծառուկյանի հետ այլեւս կապ չունի, իսկ մի մասն էլ պարզապես խմբվեց նոր ԲՀԿ-ի շուրջը:

– Բայց ոչ մի նոր բան չի ստեղծվել, հնի վրա շարունակում են գնալ առաջ: Այսօր էլ մենք խմբակցությունում օրենսդրական տարբեր առաջարկությունների շուրջ քննարկում ենք արել: Դիրքորոշումը եղել է միանշանակ՝ ընդհանուր, պարզաբանումներից հետո որոշվել է, թե որ հարցերին պետք է կողմ քվեարկել, որ հարցերին՝ ձեռնպահ մնալ եւ այլն: Այդպես էլ շարժվում ենք:

մանրամասները` սկզբնաղբյուրում