«Ծառուկյանի տղաներին» ազատել են.

«Ժողովուրդ»-ի տեղեկություններով՝ Աբովյան քաղաքի «ՄԱ-Պլազա» ժամանցային համալիրի սեփականատեր Մերուժան Խաչատրյանի սպանության վերաբերյալ ՀՀ քննչական կոմիտեի զինվորական քննչական գլխավոր վարչությունում քննվող քրեական գործով նախաքննությունն ավարտվել է: Տուժողի իրավահաջորդի ներկայացուցիչ, փաստաբան Երեմ Սարգսյանը, հաստատելով լուրը, հայտնեց, որ մեղադրյալների արարքներին ճիշտ քրեաիրավական գնահատական տալու վերաբերյալ իրենց բոլոր միջնորդությունները նախաքննական մարմնի կողմից առանց որևէ հիմնավորման մերժվել են:

Փաստաբանը տեղեկացրեց, որ երբ արդեն քրեական գործով, ըստ էության, անհրաժեշտ բոլոր քննչական և դատավարական գործողություններն ավարտված են եղել, նախաքննական մարմինը հանկարծ, առանց հիմնավորման որոշում է կայացրել հանձնաժողովային դատաբժշկական փորձաքննություն նշանակել: և հանկարծ փորձագետները հանգել են եզրակացության, որ Մերուժան Խաչատրյանի գլխի շրջանում առկա մարմնական վնասվածքների մի մասն առաջացել է ուղղակի հարվածի, իսկ մի մասն էլ՝ ընկնելու և գլխով գետնին հարվածելու հետևանքով. «Ամենահետաքրքիրն այն է, որ նույն փորձագետների կողմից որոշվել է, որ ընկնելու հետևանքով առաջացած վնասվածքներն առողջությանը պատճառել են ծանր վնաս, իսկ հարվածների հետևանքը եղել է միջին ծանրության վնաս: Առաջին հայացքից տարօրինակ ոչինչ չկա, սակայն սա նախադեպը չունեցող եզրակացություն է: Դատաբժշկական փորձաքննության եզրակացությամբ գլխի շրջանի վնասվածքների տարանջատում է արվել: Մշտապես փորձագետները պատճառաբանել են, թե յուրաքանչյուր վնասվածք էլ, անգամ փոքրիկ արյունազեղումը, կարող է ծանր վնաս առաջացնել: Ուստի շատ կասկածելի է, որ հենց այս գործով է այդպիսի եզրակացություն տրվել, որից անմիջապես հետո մեղադրյալներին առաջադրված մեղադրանքները մեղմացվել են, և նրանք անմիջապես ազատ են արձակվել կալանքից»:

Ըստ նրա՝ այս ամենից հետո նշանակվել է կրկնակի դատաբժշկական հանձնաժողովային փորձաքննություն. «Փորձագետների մի խումբը կրկին նույն տարանջատումն է արել, իսկ մյուս խումբը գտել է, որ այդպիսի տարանջատում հնարավոր չէ կատարել: Ընդ որում, առաջին խումբը, ի տարբերություն երկրորդի, իր հետևությունները բացարձակապես չի հիմնավորել, սակայն նախաքննական մարմինը, չգիտես ինչու, հենց այդ չհիմնավորված հետևությունն է հիմք ընդունել, երևի այն պատճառով, որ դրանով մեղմացվում է մեղադրյալների արարքները»:

Մանրամասները՝ թերթի այսօրվա համարում։