Ծառուկյանը երբեք ընդդիմադիր չի եղել

«Քրիստոնեա-ժողովրդական վերածնունդ» կուսակցության նախագահ Սոս Գիմիշյանը դժվարանում է ասել, թե ԲՀԿ հիմնադիր Գագիկ Ծառուկյանի վերադարձով ինչ կարող է փոխվել քաղաքականության մեջ: Նա Fnews.am-ի հետ զրույցում նկատեց, որ ամեն ինչ կախված է նրանից, թե ինչ նպատակներով ու արժեքներով է վերադարձել Ծառուկյանը, և ինչ է ուզում անել: «Եթե նա գալիս է երկրում իրավիճակ փոխի՝ որպեսզի գործող իշխանությունից ազատվենք, դա մի բան է, իսկ եթե գալիս է իշխանության համար ինչ-որ ծառայություններ մատուցելու և իշխանության վերարտադրման համար՝ բացասական է նրա գալը»,-ասում է Սոս Գիմիշյանն ու նշում, որ ցանկացած քաղաքականություն մտնող ուժի մուտքը՝ գնահատվում է նրա գործով ու իր առջև դրած նպատակներով: Նա այնքան էլ համաձայն չէ քաղաքական դաշտում շրջանառվող այն տեսակետի հետ, որ մինչև 2015 թվականի փետրվարյան հայտնի դեպքերը Գագիկ Ծառուկյանի վարկանիշն ավելի բարձր էր, քան այսօր:

«Նայած թե ինչով են չափում, ու նրանց չափման միավորը որն է… մարդու վարկանիշը կարող է տատանվել, էլի եմ կրկնում, կապված նրա գործունեության հետ: Այն արժեքներին որին կդավանի Ծառուկյանը և որի մասին կհրապարակվի, դրանից էլ կախված կլինի նրա վարկանիշի տատանումը»,-նշում է Սոս Գիմիշյանը: Նրա դիտարկմամբ՝ ցանկացած քաղաքական գործչի վարկանիշը կապված է հասարակության գնահատականի հետ, իսկ հասարակությունն ուզում է բարելավել երկրի վիճակն ու ազատվել իշխանությունից: «Նույիսկ ամենավատ մարդը կարող է բարձր վարկանիշ ձեռք բերել, եթե գործում է ժողովրդի օգտին, հակառակ դեպքում ամոթանքի կարժանանա…»,- ասում է մեր զրուցակիցն ու հավելում, որ Գագիկ Ծառուկյանը, գոնե իր վարկանիշի համար, պետք է ոչ թե իշխանության, այլ ժողովրդի հետ լայն կոալիցիա ստեղծի:

Սոցիոլոգ Ահարոն Ադիբեկյանն էլ վստահ է, որ Գագիկ Ծառուկյանը ինչպես միշտ եղել է, այնպես էլ հիմա՝ վերադարձել է որպես կենտրոնամետ ուժ: Նա Fnews.am-ի հետ զրույցում նշում է, որ հարցումներ չեն արել, սակայն իրենք հաստատ գիտեն, որ նրա նախկին ընտրողների 40 %-ը տեղյակ էլ չեն եղել, որ Գագիկ Ծառուկյանը քաղաքականությունից դուրս է եկել քաղաքականությունից: «Ծառուկյանը դժվար թե որևէ փոփոխություն անի, նա քաղաքական դաշտ կվերադառնա իր նախկին ձևաչափով՝ որպես կենտրոնամետ ուժ…»,- ասում է Ահարոն Ադիբեկյանն ու հավելում, որ Ծառուկյանը երբեք ընդդիմադիր չի եղել: