Չի բացառվում, որ այս իշխանությունը այս կամ այն մարդուն հանձնի Ադրբեջանին. Բաբուխանյան

Ադրբեջանի գլխավոր դատախազությունը հայտարարել է, որ Արցախի Հանրապետության նախագահ Արայիկ Հարությունյանը շուտով կկալանավորվի եւ կհանձնվի իրենց հետաքննությանը։ «Իրավունք TV»-ի տաղավարում այս մասին զրուցել ենք «Ուժեղ Հայաստան Ռուսաստանի հետ. հանուն նոր Միության» շարժման գործադիր կոմիտեի անդամ, ՍԻՄ կուսակցության նախագահ ՀԱՅԿ ԲԱԲՈՒԽԱՆՅԱՆԻ հետ:

- Ինչպե՞ս եք վերաբերում նրան, որ անգամ Ադրբեջանի գլխավոր դատախազության բավական կոշտ հայտարարության մասին լռում է հայաստանյան իշխանությունը:

- Բերանները ջուր են առել ու վախենում են մի փոքր նույնիսկ հակադարձել ադրբեջանցիներին: Այդպիսի բան չի եղել սկսած 1988 թվականից մինչեւ օրս, որ Արցախի  ղեկավարի հանդեպ Ադրբեջանը այդքան լպիրշ հայտարարություններ անի եւ ՀՀ իշխանությունը լռի: Ավելին՝ միայն իշխանությունը չէ, որ ձայն չի հանում: Պրակտիկապես միայն մեր «Ուժեղ Հայաստան Ռուսաստանի հետ. հանուն նոր Միության »շարժումն է, որ հայտարարությամբ հանդես եկավ եւ շատ խիստ նախազգուշացրեց Ադրբեջանին եւ նրա  հետեւում կանգնած ուժերին, որ հասկանում ենք այն խաղը, որը նրանք այսօր վարում են Արցախի եւ հայ ժողովրդի դեմ: Բայց տեսեք, իրականում Արցախն այսօր Հայաստանի իշխանությունների համար խոչընդոտ է, որովհետեւ նախ Արցախի համար պետք է պայքարել, իսկ իրենք չեն ուզում եւ երկրորդ՝ Արցախն այսօր Ռուսաստանի խաղաղապահ ուժերի պատասխանատվության գոտի է, իսկ ներկայիս հայաստանյան իշխանության նպատակը Ռուսաստանին ընդհանրապես դուրս մղելն է տարածաշրջանից: Այդ քաղաքականության մեջ է նրանց գործունեության հիմնական ուղղվածությունը, հետեւաբար Արցախը նրանց բոլոր կողմերից խանգարում է: Սրանք ամեն ինչի համաձայնվում են եւ ամեն ինչի ընդունակ են, եւ չի բացառվում, որ մի օր էլ ենթարկվելով ադրբեջանցիների պահանջներին՝ այս իշխանությունն այս կամ այն մարդուն հանձնի Ադրբեջանին:

- Ըստ Ձեզ, Արցախի նախագահ Արայիկ Հարությունյանի անձո՞վ է պայմանավորված, որ նաեւ հայաստանյան ընդդիմությունն էր բավական պասիվ Ադրբեջանի գլխավոր դատախազության հայտարարությանն արձագանքելու հարցում:

- Արայիկ Հարությունյանի անձն այստեղ որեւէ կապ չունի: Կարող ես ընդունել այդ անձին կամ չընդունել, սա որեւէ առնչություն չունի հարցի քաղաքական կողմի հետ: Կա Արցախի ընտրված ե՛ւ Ազգային ժողով, ե՛ւ նախագահ: Արցախի օրինական ընտրված ղեկավար մարմինները մեզ համար օրինական են եւ պետք է պաշտպանենք նրանց իրավասությունները: Նրանց, այսպես ասած, գլխատելով ու փորձելով շարքից հանել՝  ադրբեջանցիներն ուզում են ընդհանրապես զրկել Արցախի հանրապետությունը պետականության որեւէ նշույլից: Վստահ եմ, որ նման բան չի լինելու, բայց եթե հանկարծ  նրանց ինչ-որ ձեւով հաջողվի հասնել իրենց երազանքներին եւ Արցախին զրկել նախագահից ու Ազգային ժողովից, իհարկե, այլեւս թույլ չեն տալու, որ նոր ընտրություն անցկացվի: Կփորձեն ամեն ինչ անել, որպեսզի Արցախը մնա առանց իշխանությունների, որի դեպքում Արցախի ճակատագիրը կլինի բավականին բարդ: Այդ դեպքում՝ կունենանք ազգային լուրջ խնդիր, որի լուծումը այս պահին չի երեւում: Ու այս ֆոնին մենք տեսնում ենք, որ Հայաստանի իշխանությունները զավթած հակազգաին խմբակը բացի վնասից՝ ոչ մի օգուտ Արցախին չի բերում:

Հ.Գ.- Հարցազրույցն ամբողջությամբ դիտեք տեսանյութում.

Iravunk.com