Comment. «Осторожно, злой Вагарш»

Comment

Դեռ խորհրդային ժամանակներից հիշում ենք տարբեր վայրերում փակցված ցուցանակները, որոնց վրա ռուսերենով գրված էր՝ «Осторожно, злая собака»: Այսօր նման զգուշացնող ցուցանակի կարիք է զգում Երևանի Խորենացու փողոցի այն հատվածը, որտեղ գտնվում է ոսկու շուկան, ընդ որում՝ ցուցանակ հետևյալ բովանդակությամբ՝ «Осторожно, злой Вагарш», կամ էլ հայերենով՝ «Զգուշացեք, Վաղարշը կատաղել է»:

Իսկ Վաղարշը՝ Ոսկու շուկայի սեփականատեր Վաղարշ Աբրահամյանը, իրոք որ կատաղել է, շուկայի ներսում սեղաններ է պոկում, աշխատողներին հրահանգում սեղանները պատուհանից դուրս շպրտել: Նույնիսկ հայտնի է, թե ով է կատաղեցրել Մուրադին, այսինքն՝ Վաղարշին: Պարզվում է, որ մեղավորները օրենքը չհարգող ոսկերիչներն են, ովքեր իրենց սեղաններին տեր կանգնելու և վաճառքով զբաղվելու փոխարեն Կառավարության շենքի մոտ բողոքի ցույցի են մասնակցում: Եւ ահա մեր Վաղարշ Օրինապաշտը, իրեն այս ու այն կողմ է գցում, աշխատակիցներին <տուն> վերադարձնելու համար:

Այնպես որ, հարգելի համաքաղաքացիներ, ոսկու շուկայի մոտով անցնելիս այսուհետ զգույշ եղեք, նույնիսկ ցանկալի է՝ սաղավարտներ կրեք, թե չէ հանկարծ շուկայի շենքի պատուհանից կարող է մի սեղան ընկնել ուղիղ Ձեր գլխին՝ հանուն օրենքի: Զգուշացեք Վաղարշից:

Արտյոմ  Եդիգարյան