Comment.Աշոտյանի «փայը»

Comment 

Գագիկ Ծառուկյանի հայտարարությունն այն մասին, որ որևէ պաշտոնյա չի կարող չարաշահել իր իրավասությունները, մասնավորապես «փայ մտնել», շարժել էին շատերի հետաքրքրությունները , քանի որ իրոք զարմանալի է, երբ օլիգարխը քննադատում է փայ մտնելու՝ տիպիկ օլիգարխիկ սովորույթը: Հետևաբար այս առիթով եղան նաև քննադատություններ, որոնք սպասելի էին: Սակայն անհասկանալի է այս կապակցությամբ ՀՀԿ-ականների վրդովմունքը: Չէ՞ որ անկախ նրանից, թե ով է ասողը, պետք է ընդունել, որ իրենց մասով ճիշտ է ասված և փայ մտնելու պրակտիկան Հայաստանում կիրառվում է: Իսկ այն, որ Ծառուկյանն ինքը փայ մտնող է, դա այլ հարց է:

Եւ ուրեմն այս վրդովվածներից հատկապես տպավորիչ էր ՀՀ կրթության ոլորտի և կրթական համակարգի գլխավոր դերակատար, երիտասարդ կարկառուն ՀՀԿ-ական Արմեն Աշոտյանի վրդովմունքը: Ահա թե ինչպես է պատասխանել Ծառուկյանին Աշոտյանը՝ «Կարծում եմ՝ այդ հարցերը պետք է ուղղել Գագիկ Ծառուկյանին, ես Գագիկ Ծառուկյանը չեմ, ցույց տվեք այն փայը, որտեղ ես մտել եմ և ուղղեք ինձ այդ հարցը»:

Հիմա փորձենք Աշոտյանին ցույց տալ այդ փայը. եթե բժշկական համալսարանի նախկին ուսխորհրդի նախագահին բժիշկ դառնալու փոխարեն դարձնում են ՀՀԿ-ական պատգամավոր, հետագայում էլ բժշկությամբ զբաղվելու փոխարեն կրթության և գիտության նախարար են դարձնում, մի՞թե դա փայ մտնել չէ: Էլ ի՞նչ բիզնեսում փայ մտնելու կարիք ունի Աշոտյանը, երբ որ իշխանության մեջ փայ ունի, վայելում է կրթության նախարարի պաշտոնը՝ ի «ուրախություն» մեր բազմաչարչար կրթական համակարգի:
Այնպես որ մենք ընդամենը գործ ունենք մի մեծ արատավոր համակարգի տարբեր փայատերերի հետ, պարզապես Աշոտյանն այս հարցում դեռ լրացուցիչ փորձ ձեռք բերելու տեղ ունի: Կարծում եմ, ինքն էլ հույսեր կունենա, որ հետագայում իշխանության մեջ փայ մտնելու արվեստում ավելի կհմտանա:

Արտյոմ   Եդիգարյան