Դանակը ոսկորին է հասել...

Քաղաքագետ Գագիկ Համբարյանը վստահ է ՝ իշխանությունները դանակը ոսկորին են հասցրել․ հասարակությունն այլևս չի կարողանում դիմանալ սոցիալական բեռին։ Նախորդ տարվա նոյեմբերից գնաճը սկսվել է ու կանգ չի առնում․ նոր տարվա առաջին օրերին էլ գնաճ տեղի ունեցավ։ Այս մասին Fnews.am-ի հետ զրույցում նշեց քաղաքագետ Գագիկ Համբարյանը։
«Այս թանկացումները սոցիալական աղետ են դարձել մեր երկրի համար»,-նշեց քաղաքագետը։

Հիշեցնենք, որ  հունվարի 19-ին «Ելք» դաշինքը երթ է անցկացնելու՝ ընդդեմ թանկացումների։ Այս քաղաքական ուժը հույս ունի, որ իրեն կմիանա նաև ժողովուրդը, և ցույցին կմասնակցեն ժողովրդի լայն զանգվածները։ Ավելին, նախատեսվում է, որ ամենայն հավանականությամբ, ցույցերը կլինեն շարունակական։
Քաղաքագետը, սակայն, կարծում է՝ այժմ մեր քաղաքական դաշտում չկա ինչ-որ ուժ, որը կկարողանա հուժկու երթեր կազմակերպել։

«Գիտե՞ք՝ «Ելք»-ն այո՛, կարող է երթեր կազմակերպել, բայց հուժկու երթեր կազմակերպելն, իմ կարծիքով, նրանց համար դժվար կլինի։ Հասարակության ու իշխանությունների միջև մեծ անջրպետ է գոյացել։ Այն, ինչ տեղի է ունենում տնտեսական ու սոցիալական բնագավառներում, ուղղակիորեն աննկարագրելի է։ Թանկացումներ կարող է թույլ տալ այն մարդը, ով ով բացարձակ ծանոթ չէ ժողովրդի սոցիալ-տնտեսական վիճակին։ Ես զարմանում եմ, որ մեր իշխանությունները այսպիսի բան են թույլ են տալիս․ բյուջեն լցնելու համար մեր հասարակությունը թալանվում է։ Իշխանություննեը հետաքրքիր ձևով են մտածում։ Այս գնաճի տեմպերին զուգընթաց՝ ո՛չ թոշակն է բարձրանում, ո՛չ էլ նպաստներն ու աշխատավարձերը», - նշեց քաղաքագետը։