Դատարանը երկարացրել է Պերմյակովի կալանքի տակ գտնվելու ժամկետը մինչև 2016–ի հունվարի 30-ը

Tert.am-ը գրում է.

Հայաստանում ռուսական կայազորի ռազմական դատարանը օգոստոսի 12-ին նշանակել է Գյումրիում Ավետիսյանների ընտանիքի սպանության գործով մեղադրյալ զինծառայող Վալերի Պերմյակովի նկատմամբ քրեական գործով դատական նիստ: Այդ մասին РИА Новости-ին հայտնել է Հյուսիս-կովկասյան շրջանային ռազմական դատարանի մամուլի քարտուղար Ալյոնա Կածկալոն:

«Հինգերորդ կայազորային ռազմական դատարանի դատավորի որոշման համաձայն՝ Պերմյակովի նկատմամբ քրեական գործով բաց դատական նիստը նշանակվել է 2015 թվականի օգոստոսի 12-ին»,- ասել է գործակալության զրուցակիցը:

Դատարանը նաև երկարացրել է Պերմյակովի կալանքի տակ գտնվելու ժամկետը մինչև 2016–ի հունվարի 30-ը:

Պերմյակովին մեղադրանք է ներկայացված ՌԴ քրեական օրենսգրքի երեք հոդվածներով նախատեսված հանցագործություններ կատարելու մեջ՝ զենքով դասալքությունն, զենքի և զինամթերքի գողանալը և զենքի և զինամթերքի անօրինական ձեռքբերումը, փոխանցումը, պահպանումը, տեղափոխությունը և կրումը:

Նրա նկատմամբ քրեական գործ է հարուցել նաև հայկական կողմը՝ ՀՀ քրեական օրենսգրքի 104-րդ հոդվածի 2-րդ մասի 1-ին կետով (երկու և ավելի անձանց սպանություն):