Դատախազը պահանջել է «Մալայանի» բժշկուհուն տուգանել 200.000 դրամի չափով

Հիվանդին սխալ ներարկում կատարելու պատճառով միջին ծանրության վնասվածք հասցնելու համար մեղադրվող «Մալայանի» բժշկուհի Աննա Գասպարյանին դատախազը պահանջել է ենթարկել 200.000 դրամի չափով տուգանքի: Այս մասին NEWS.am-ի հետ զրույցում ասաց բժշկուհու պաշտպան Վարդուհի Էլբակյանը: Հիվանդին միջին ծանրության վնասվածք հասցնելու համար մեղադրվող ակնաբույժ Աննա Գասպարյանի գործով դատարանում հարցաքննվել է  Երեւան քաղաքի գլխավոր ակնաբույժ Արտաշես  Զիլֆյանը եւ ՀՀ ԱՆ գլխավոր ակնաբույժ Ալեքսանդր Մալայանը, որն ասել է, որ բշկուհին մեղավոր չէ հիվանդի աչքի շլացման համար:

Նշենք, որ տուժող Աննա Կնյազյանը պնդում է, որ ակնաբույժ Աննա Գասպարյանն իրեն սխալ ներարկում է արել, ինչի հետեւանքով իր աչքը այտուցվել է եւ շլացել։ Կրկնակի փորձաքննությամբ հաստատվել է, որ տուժողի մոտ առողջական խնդիրներն առաջացել են սխալ ներարկման պատճառով։ Ամբաստանյալը, սակայն, պնդում է, որ ինքն ամեն ինչ ճիշտ է արել, իսկ փորձաքննության արդյունքների հետ համաձայն չէ։

Ըստ մեղադրական եզրակացության`Աննա Գասպարյանին մեղադրանք է առաջադրվել Աննա Կնյազյանի առողջությանն անզգուշությամբ միջին ծանրության վնաս հասցնելու համար: Աննա Գասպարյանին մեղադրանք է առաջադրվել ՔՕ 130-րդ հոդվածի 1-ին մասով, որը պատժվում է երեք ամսվա ազատազրկմամբ կամ նվազագույն աշխատավարձի 100–200–ապատիկի չափով տուգանքով: