Դեռ չկազմավորված քաղաքական քառյակն արդեն փլուզված էր

Վերջին ժամանակներս, քաղաքական քառյակը կարծես թե սկսել է ճոճվել: Հավանաբար դա պայմանավորված է նրանով, որ որոշների ցուցամատերն ու բարձր տոնայնությունն այլեւս եղանակ չեն փոխում սեփական խելքն ու հնարավորությունները գնահատող մի շարք պատգամավորների մոտ: Այս պարագայում, անգամ պատկերացնելն է սարսափելի, թե ինչ կարող է լինել, եթե պատահաբար բնական աղետ տեղի ունենա՝ «կկոտրվեն» ոչ միայն մարդկային սրտեր, այլ նաեւ ընդհատակ կանցնեն նրանց կողմից գծված խոշոր «պրոեկտները»... Ինչեւէ, հասկանալու համար, թե «կփլվի՞» արդյոք քաղաքական քառյակը, թե ոչ Fnews.am-ը զրուցեց «Սոցիոմետր» անկախ սոցիոլոգիական կենտրոն տնօրեն Ահարոն Ադիբեկյանի հետ, ով իր խոսքում մասնավորապես նշեց.«Դեռ քառյակ չկա, պարզապես միտումներ կան միավորվելու, բայց քանի որ նրանք տարբեր ընկալումներ ունեն սահմանադրական բարեփոխումների վերաբերյալ, պարզ է, որ նրանց միավորումն անհնար է: Եթե գան մեկ՝ ընդհանուր հայտարարի, ապա պետք է նստեն ընդհանուր քննարկման եւ հասկանան, թե ինչն է հարկավոր ենթարկել փոփոխման: Եթե հանձնաժողովի առաջարկները մտան Ազգային ժողով հաստատման կամ դրվեցին հանրաքվեի, ապա ակտիվությունը կլինի բավականին ցածր: Կարծում եմ, գործող իշխանություններն իրենց տարբերակն առաջ կքաշեն ու կհաստատեն: Չեմ գտնում, որ առաջընթացի համար ՀՀ Սահմանադրությունն է հարկավոր փոխել. նախեւառաջ մենք ինքներս պետք է փոխվենք, եթե մենք չփոխվեցինք՝ մեր Սահմանադրությունը չի փոխվի: Կարելի է ասել, որ դեռ չկազմավորված քաղաքական քառյակն արդեն փլուզված էր, որովհետեւ տեսակետները հակադիր են: Միավորման տարբերակներ միշտ են եղել, սակայն դրանք չեն ստացվել»:

Սոսե  Չանդոյան