Դեռ վաղ է այդ մասին խոսել, թե ի՞նչ նպատակով եւ ինչո՞ւ հենց սպանվածների տուն է մտել Պերմյակովը...

"Դեռ վաղ է այդ մասին խոսել, թե ի՞նչ նպատակով եւ ինչո՞ւ հենց սպանվածների տուն է մտել Պերմյակովը, եւ որն՞ է եղել առհասարակ նրա դրդապատճառը Ավետիսյանների տուն մտնելու: Վերջինս իր ցուցմունքներում նշել է նաեւ, որ մտել է թալանի նպատակով, որը նորություն չէր եւ ի սկզբանե է էլ պարզ էր, որ Ավետիսյանների տանից կային պակասող որոշակի իրեր մասնավորապես բջջային հեռախոսներ եւ տեղեկություններ կային, որ այդ բջջային հեռախոսները հետագայում հայտնաբերվել են Պերմյակովի մոտ: Սակայն, մի բան հստակ է, մինչ այս փուլը մեր ձեռքի տակ ունեցած փորձագետի եզրակացություններով արդեն կարող ենք ստույգ ասել, որ Պերմյակովը եղել է Ավետիսյանների տանը եւ Պերմյակովը կրակոցներ է արձակել սպանվածների տանը:

Այս պահի դրությամբ այդ ապացույցները ես հիմնավոր եմ համարում: Միանժամանակ կարող եմ ասել հետեյալը` ներկա լինելով դասալքության գործով Պերմյակովի դատավարությանը, վերջինսիս վարքագիծը դատավարության ընթացքում խիստ տարօրինակ է: Ես կարծում եմ, որ Պերմյակովը որոշ հոգեբանական խնդիրներ ունեցող անձնավորություն է, որը արտաքինից նկատելի է: Եվ ես համոզված եմ, որ նրա նկատմամբ պետք է նշանակվի դատահոգեբուժական համալիր փորձաքննություն, նրա հոգեբանական վիճակը գնահատելու համար: Եվ դրանից ակնհայտ կլինի նրա գործողություններին եւ նրա ցուցմունքներին գնահատական տալը",-Fnews.am-ի հետ զրույցում, անդրադառնալով հարցին, թե ի վերջո ի՞նչ նպատակով է Պերմյակովը մտել գյումրեցի Ավետիսյանների տուն եւ դաժան սպանդի ենթարկել ընտանիքի յոթ անդամներին` չխնայելով անգամ մանկահասակ փոքրիկին, ասաց Ավետիսյանների ներկայացուցիչ, փաստաբան Երեմ Սարգսյանը:

Տաթեւիկ Աբրահամյան