Դեղերի գները բարձրանալու են 2-5 դրամով

Yerkir.am-ը գրում է. Այսօր ԱԺ-ում, երբ քննարկվում էր առողջապահության ոլորտի 2015թ. բյուջեն, ԱԺ ՀՅԴ խմբակցության պատգամավոր Արծվիկ Մինասյանը առողջապահության նախարարին հարց ուղղեց դեղերի դրոշմապիտակների խնդրի մասին: Ըստ պատգամավորի` երբ այդ հարցը քննարկվում էր ԱԺ նիստում, այդպես էլ որևէ մեկի կողմից չհնչեց որևէ հիմնավորում, թե ի՞նչ նպատակով է արվում դեղերի դրոշմապիտակավորումը:

Արծվիկ Մինասյանի համոզմամբ` դեղերի դրոշմապիտակավորման հիմնական նպատակը ֆիսկալ էր` ապահովել դեղերի վաճառքի ստվերային շրջանառության սահմանափակումը: Սակայն, պատգամավորի համոզմամբ, դա առնչություն չունի դեղերի անվտանգության հետ:

Նա նշեց, որ ինքը եղել է դեղերի պահեստներից մեկում, դա ահռելի աշխատանք է` ամեն դեղահաբի տուփին փակցնել դրոշմապիտակները: Պատգամավորը մտահոգությւոն հայտնեց, որ արդյունքը չափազանց հեռու է դրական լինելուց: Նա նաեւ հավելեց, որ ներմուծման ժամանակ` սահմանին, այդ պահանջը չկա, դեղը մտավ երկրից ներս, արդեն նախարարության ստուգումները պետք է բացահայտեն` ժամկետանց դե՞ղ է, թե՞ ոչ, ուստի պետք է գնահատել այդ ֆիսկալ նպատակի հետևանքը` դրոշմապիտակավորումը որքանո՞վ կազդի դեղերի թանկացման վրա:

«Ես կոչ եմ անում ոչ թե կտրուկ մերժել փաստարկները, այլ քննարկել ու լուծումներ առաջարկել, որովհետև կա խնդիր, որը պետք է լուծվի»,- ասաց Արծվիկ Մինասյանը:

Նախարարը նշեց, որ կատարվել են հաշվարկներ, ըստ որոնց` դրոշմապիտակավորման հետ կապված` դեղերը թանկանալու են ընդամենը 2-ից 5 դրամով: «Ցանկացած որակական ստուգում` դեղերի որակը և ժամկետայնությունը ստուգելու համար, ընդունելի է, եթե այն չի ազդում դեղորայքի գնի վրա, այսինքն` որակական ստուգումը չպետք է լինի սպառողների հաշվին, ահա ինչու մենք մեր համաձայնություն ենք տվել այդ պրոցեսին»,- ասաց նա:

Իսկ լրագրողների հետ զրույցում, անդրադառնալով այդ խնդրին, նախարարը նշեց, որ առողջապահության նախարարությանն են վերաբերում դեղերի աննվտանգության և որակի հետ կապված խնդիրները, մնացած բոլոր խնդիրները վերաբերում են ֆինանսների նախարարությանը, որն էլ նախաձեռնել է այդ գործընթացը:

«Ինչ վերաբերում է դեղերի գների բարձրացմանը, մեր հաշվարկներով` բարձրացել է 2-5 դրամ, ոչ ավելի, այնպես որ` գների բարձրացում տեղի չի ունենա, իսկ եթե խոշոր ներկրողները փորձեն չհիմնավորված բարձրացնել դեղերի գները, մենք կարձանագրենք դա ու կզբաղվենք այդ հարցով»,- ասաց առողջապահության նախարարը: