Դոլարը վաճառվում է 500 դրամով

ՀՀ կենտրոնական բանկի կողմից դեկտեմբերի 12-ին իրականացվել է 6 մլն ԱՄՆ դոլարի վաճառք՝ 470.22 դրամ 1 ԱՄՆ դոլարի դիմաց, սահմանային փոխարժեքը կազմել է 469.76 դրամ 1 ԱՄՆ դոլարի դիմաց:
ՀՀ ԿԲ-ն տարադրամի փոխանակման կետերին արգելել է դոլարի փոխարժեքն իր սահմանած գնից՝ 470 դրամից բարձրացնել: Արդյունքում հայտարարվեց, որ տարադրամի փոխանակման կետերը դադարեցրել են դոլարի առք ու վաճառք իրականացնել, ուստի փոխարժեքի շուկայում երեկվանից այդ հարցով զբաղվում էին միայն բանկերը: Բայց արի ու տես, որ պատկերը լրիվ հակառակն է:
Shabat.am-ի թղթակիցը պարզեց, որ որոշ տարադրամի փոխանակման կետերում դոլարը վաճառվում է 500 դրամով: Դա իրականացվում է կրիմինալ ֆիլմերի էպիզոդներ հիշեցնող կերպով. Երբ որևէ մեկը ցանկանում է դոլար գնել, նրան սկզբնական գին են ներկայացնում՝ ԿԲ-ի կողմից հայտարարված 470 դրամ արժեքը, իսկ երբ տեսնում են, որ հաճախորդը պատրաստ է գործարք կնքել, առաջարկում են 500 դրամ 1 դոլարի դիմաց: Եվ դա այն պարագայում, որ ցուցատախտակներում ներկայացված է 470-475 դրամ մեկ դոլարի դիմաց:

Ցանկանում ենք տեղեկացնել, որ միայն շաբաթ-կիրակի օրերին է, որ որոշ տարադրամի փոխանակման կետեր վերածվում են վամպիրների՝ դուրս գալով ԿԲ-ի վերահսկողությունից և քամելով շուկայի ողջ պահուստները:Թե որքան կշարունակվի նման բացահայտ մութ գործարքների իրականացումը, դժվար է ասել:Արդյունքում տուժում են բոլորը բացի մնացածից:
Արդեն քանի օր շարունակ SAS սուպերմարկետների տարադրամի փոխանակման կետերը չեն գործում, իսկ Երևան City-ի փոխանակման կետերը կապ չեն հաստատում լրատվամիջոցների հետ:
Չնայած նրան, որ ԿԲ-ն հույս ունի մինչև տարեվերջ փոխարժեքի շուկան կայունացնել, թերևս դրամի փոխարժեքն իջեցնելով այնքան, որ այն համապատասխանի տնտեսությունում տիրող իրական վիճակին: