Դուք ստացել եք ձեր պատասխանը Ռուսաստանից՝ Բարբի տիկնիկի ձևով. ՀՀԿ-ականը՝ Զարուհի Փոստանջյանին

Ազգային ժողովի պետաիրավական հարցերի մշտական հանձնաժողովում քննարկվում է «Ժառանգություն» խմբակցության պատգամավոր Զարուհի Փոստանջյանի ներկայացրած` «Վալերի Պերմյակովին ՀՀ-ին փոխանցելու մասին» նախագիծը:

Հարակից զեկուցող` ԱԺ ՀՀԿ խմբակցության պատգամավոր Լևոն Մարտիրոսյանը նշեց, որ Փոստանջյանը մեղադրում է Կոստանյանին` ասելով թե չի տեսել նրա նամակը` ուղղված ՌԴ գլխավոր դատախազին, սակայն իրենք էլ չեն տեսել այն նամակը, որը Փոստանջյանն ուղարկել է Վլադիմիր Պուտինին և ՌԴ գլխավոր դատախազին:

«Մի հատ պատմություն հիշեցի, իննսունական թվականներին, երբ Բարբի տիկնիկը բերեցին Խորհրդային միություն, մինչև այդ բոլորը ուզում էին ձեռք բերել: Մի աղջնակ, որը չուներ տիկնիկ, դիմեց Գորբաչովին, որ իրեն Բարբի տիկնիկ տրամադրեն: Ստացավ իր իսկ դիմումի նամակը` տարբեր մակագրություններով, բայց Բարբին չստացավ: Հիմա Դուք ստացել եք Ձեր պատասխանը` Բարբիի տեսքով»,- ասաց Մարտիրոսյանը:

Զարուհի Փոստանջյանն արձագանքեց` ասելով, որ ՀՀԿ-ականի հումորը տեղին չէ: «Ձեր հումորը տեղին չէ, եթե Դուք իրազեկ չեք այդ խնդրով և հարակից զեկուցող եք, ամոթ է: Դուք Բարբիների օրինակներ եք բերում և չեք պատրաստվել հարակից զեկույցի համար: Չգիտեք, թե ինչպիսին է եղել իմ նամակը և պատասխանը»,- ասաց Փոստանջյանը և ՌԴ գլխավոր դատախազին ուղղված նամակը հանձնեց Լևոն Մարտիրոսյանին: «Հուսամ, որ ռուսերեն կարդալ գիտեք, կարդացե'ք: Հարիր չէ, որ այս հարցի շուրջ նման պատմություններ եք պատմում»,- ասաց Փոստանջյանը:

«Հարիր է, շատ լավ հարիր է»,- պատասխանեց Լևոն Մարտիրոսյանը:

Նշենք, որ Վալերի Պերմյակովին Հայաստանին փոխանցելու որոշման նախագծի վերաբերյալ ԱԺ իրավաբանական վարչությունը եզրակացություն չի ներկայացրել: Զարուհի Փոստանջյանի ներկայացրած նախագիծը դրվեց քվեարկության, սական ձայների ոչ բավարար քանակության պատճառով չընդգրկվեց ԱԺ նիստերի օրակարգում:

Նախագիծը ԱԺ օրակարգ մտցնելուն կողմ քվեարկեցին ՀԱԿ-ական Գագիկ Ջհանգիրյանը, ՕԵԿ-ական Հովհաննես Մարգարյանը, ՀՅԴ-ից Արծվիկ Մինասյանը և ինքը` Զարուհի Փոստանջյանը:

Նշենք, որ որոշում ձեռք բերվեց, որ պետաիրավական հարցերի հանձնաժողովը պետք է նամակներ ուղարկի ՀՀ իրավապահ մարմիններին՝ պարզելու որոշակի հարցեր: