Էդ փալասի ականջից թող բռնեն բերեն փողերը դնի իրենց գործի համար․ Վարդան Ղուկասյան

Հատկապես Սերժ Սարգսյանի կողմից Գյումրիի խնդիրների վերաբերյալ մարզի պատասխանատուների հետ քննարկումից ու այդ հանդիպմանը Գյումրիի քաղաքապետ Սամվել Բալասանյանին չհրավիրելուց հետո, ինչպես նաև Սերժ Սարգսյանի Գյումրի այցի ժամանակ Բալասանյանի հետ ունեցած խիստ ու լարված զրույցից հետո նախկին քաղաքապետ Վարդան Ղուկասյանի համար կանաչ լույս է վառվել: Կարծիքներ կան, որ ոչ այլ ոք, քան նա կարող է գլխավորել Գյումրիում «այո»-ի շտաբը: Հակառակ դեպքում, եթե այդ գործը վստահվի Սամվել Բալասանյանին, ապա դեկտեմբերի 6-ին Գյումրին հերթական անգամ կապացուցի, որ ընդդիմադիր քաղաք է, որտեղ հնարավոր չէ «խփել այնքան, ինչքան պետք է»: Այն, որ Սամվել Բալասանյանը լավագույն թեկնածուն չէ, վստահ է նաև նախկին քաղաքապետը, որին, սակայն, իշխանությունները չեն շտապում խաղի մեջ մտցնել: Այս թեմայով «Առաջին լրատվական»-ը զրուցեց Գյումրիի նախկին քաղաքապետ Վարդան Ղուկասյանի հետ:

– Ինձ ոչ ոք դեռ ոչ մի բան չի առաջարկել, բայց ես իմ խոսքը , իմ «այո»-ն ժողովրդին դեռ կփոխանցեմ:

– Եթե ձեզ առաջարկ չի արվել, ինչպե՞ս եք գյումրեցիներին համոզելու «այո» ասել նոր Սահմանադրությանը:

– Չգիտեմ: Ես ոչ մի տեղ չեմ աշխատում, ոչ մի լծակ չունեմ, բայց ինչ խոսք, ես իմ խոսքը կասեմ: Եթե զգամ, որ քաղաքում ձևավորված շտաբը չի գործում, իմ կարիքը կա, ապա ես միանգամից «այո»-ի կողմնակից կդառնամ ու ժողովրդին կասեմ իմ խոսքը: Կգա ժամանակը, ու իմ կարծիքը կլսեք:

– Պարոն Ղուկասյան, այն փաստը, որ Սերժ Սարգսյանի կողմից Գյումրիի խնդիրների վերաբերյալ խորհրդակցությունն անցնում է առանց քաղաքապետի, Ձեր կարծիքով՝ չի՞ խոսում այն մասին, որ «այո»-ի շտաբը Բալասանյանը չի գլխավորելու:

– Վերջապես ձեզ ինչ ապացույց, փաստեր են պետք, որ այդ մարդը քաղաքապետ չի: Նա քաղաքափետ է:

– Բայց Ձեր կարծիքով՝ Բալասանյանը կկարողանա՞ իշխանության համար ցանկալի «այո»-ն ապահովել Գյումրիում հանրաքվեի օրը:

– Ինքն անգամ իր համար ձայներ չի կարող ապահովել: Ինքը եթե ինչ-որ ծրագրում, գործում ընդգրկված է, ուրեմն այդ գործը պրավալ է, քանի որ Գյումրիում նրանից զզվում են, չեն սիրում:

– Այսինքն՝ իշխանությունները կձախողե՞ն հանրաքվեն, եթե Գյումրիում այդ գործը վստահվի Բալասանյանին:

– Այո՛, բոլորն էլ լավ գիտեն դա:  Բոլորն էլ լավ գիտեն, թե նա քանի ձայն կարող է ապահովել, քանի ձայն ունի: Բոլորն էլ լավ գիտեն, թե նա ոնց է դարձել պատգամավոր, ապա քաղաքապետ:

– Բայց այս փուլում իշխանությունները հենց նրա հետ համատեղ Գյումրիում լուծում են անօթևանների հարցը, բնակարաններ են հատկացնում:

– Ես մի բան գիտեմ, որ այն քաղաքապետը, որը դիմում է գրում երկրի կառավարությանը ու ասում է՝ քաղաքում բնակարան մի կառուցեք, այլ ԲԳՎ  ծրագիր իրականացրեք, ապա նա երկրի ու քաղաքի թշնամին է, քանի որ էդ բնակարանները, որ հիմա տալիս են բնակիչներին, նրանք վաճառում ու հեռանում են Հայաստանից կամ քաղաքից: Այդ ԲԳՎ-ների ծրագիրը պարզապես նպաստում է արտագաղթին:

– Պարոն Ղուկասյան, իսկ գյումրեցին, Ձեր կարծիքով, տեղյա՞կ է նոր Սահմանադրությունից և գիտի՞ ինչին է «այո» կամ «ոչ» ասելու:

– Բացարձակապես տեղեկացված չեն: Ոչ ոք այստեղ քարոզ չի տարել, բացարձակ: Բայց իշխանությունը պետք է լուրջ աշխատանք տանի, լուրջ քարոզարշավ անի, լուրջ մարդկանց ներգրավի այդ գործում, այդ շտաբում, որպեսզի կարողանա արդյունք գրանցել, հակառակ դեպքում կձախողվեն: Որ պահին իրենք հասկանան, որ ես իրենց պետք եմ, ես պատրաստ եմ, բայց դեռ տեղաշարժ չեմ տեսնում: Միակ բանը որ առայժմ տեսնում եմ՝ լուրջ հակաքարոզչությունն է տարբեր թևերի կողմից: Ցավում եմ, որ պետական կառույցը, իշխանությունները այդպես չեն լծվել այդ գործին: Թե  ինչի են սպասում, չեմ կարող ասել:

մանրամասն՝այստեղ: