Եգիպտոսի հյուրանոցների մեկում լուրջ բախում է տեղի ունեցել հայ օրենքով գողերի միջեւ

Օրեր առաջ, Եգիպտոսի հյուրանոցներից մեկում, լուրջ բախում է տեղի ունեցել քրեական աշխարհի ներկայացուցիչների միջեւ: 

Գործն իհարկե ծեծկռտուքի չի հասել, սակայն բավականին տհաճ եւ կոշտ խոսակցություն է ծավալվել «օրենքով գողեր» Ալեքսանդր Մակարյանի (Ալոյի), Ժիրայր Բրուտյանի՝Ժիրոյի, «Գորիսեցի Արտեմիկ» մականվամբ Արտեմ Դինունցի, եւ «Օշականցի Գևորիկի» միջեւ, որին ներկա են եղել եւս երկու վրացի օրենքով գողեր:

Fnews.am-ին հասած տեղեկությունների համաձայն, «օրենքով գողեր» Ալոն, Ժիրոն,  ու «Գորիսեցի Արտեմիկը» «աչոտ» են պահանջել Օշականցի Գեւորիկից, 2018 թվականի մարտի 21-ին Բանգլադեշի գարեջրատներից մեկում օդից սկանդալ հրահրելու եւ ծեծկռտուք կազմակերպելու համար, որին մասնակից են եղել «օրենքով գողեր» Անդրանիկ Սողոյանը՝ նույն ինքը ԶԱՊ-ը, եւ Սուրեն Ավետիսյանը՝ Լենինականցի Սուրոն:
Ըստ նույն լուրերի, Ալոն, «Գորիսեցի Արտեմիկ»-ն ու Ժիրոն, վրացի «օրենքով գողերի» ներկայությամբ պատերազմ են հայտարարել Գեւորիկին՝ ասելով որ, Գեւորիկը խախտել է գողական աշխարհի կանոնները, եւ որ այդ խախտումները չեն կարող անպատասխան մնալ:
Fnews.am-ին հասած տեղեկությունների համաձայն, Օշականցի Գեւորիկը Երեւան հասնելուն պես, «սխոդկա» է կազմակերպել ՀՀ-ի քրեական ռեզերվի ու գողական աշխարհի հետ՝ ներկայացնելով Եգիպտոսում տեղի ունեցած միջադեպի մանրամասներն ու սպասվող հնարավոր սցենարները…

Հիշեցնենք, որ քրեական աշխարհում կրքերը թեժացան հատկապես 2016 թվականի հայտնի դեպքերից հետո, երբ Սասնա ծռեր խմբավորման անդամները գրավեցին Էրեբունու ՊՊԾ գունդը:

Հիշեցնենք նաեւ, որ այդ օրերին, Ռուսական «Պրայմ Քրայմ» գործակալությունը հանդես եկավ մի հրապարակմամբ, ուր մասնավորապես խոսվել էր այն մասին, որ.
«Հայաստանից Թուրքիա են արտաքսվել երևանցի «օրենքով գողեր» 51-ամյա Ալեքսանդր Մակարյանը (Ալո) և 37-ամյա Նորայր Փիլոյանը (Կոնչո): Նշվում է, որ վերջին տասնամյակում սա առաջին դեպքն է, երբ Հայաստանի իշխանությունները մեջքով են շրջվել ազգությամբ հայ «օրենքով գողերին», ինչը ըստ էության վրեժ է գողական էլիտայի առանձին անդամների նկատմամբ:

Ըստ գործակալության տեղեկությունների, իշխանություններն իրենց խնամակալության տակ գտնվող «օրենքով գողերից» պահանջել են վերադարձնել «պարտքը» երկարամյա հանգստության համար. այն է, դեմ արտահայտվել, այսինքն` մահվան դատավճիռ կայացնել հուլիսի 17-ին Էրեբունու ՊՊԾ գունդը գրաված ընդդիմադիրների նկատմամբ:
Մասնավորապես, նման հրահանգով մեկուսարանի (որտեղ պահվում են ՊՊԾ գունդը գրաված խմբի անդամները) «նայողի» նկատմամբ հանդես են եկել 46-ամյա «օրենքով գող» Գևորգ Մելիքյանը (Օշականցի Գևորիկ), ինչպես նաև գյումրեցիներ 48-ամյա Անդրանիկ Սողոյանը (Զապ) և 43-ամյա Սուրեն Ավետիսյանը (Սուրո):
Սակայն երևանյան «բլատկոմիտեն» Ռաֆայել Խոյեցյանի (Աֆո), Սամվել Հարությունյանի (Սամո), ինչպես նաև վերը նշված Ալոյի և Կոնչոյի գլխավորությամբ փորձել են իրենց եղբայրներին բացատրել, թե ինչով են գողական աշխարհի առաջ մեղավոր նրանք, ովքեր պահանջում են կառավարության հրաժարականը, կամ ինչու իրենք պետք է իրենք ներքաշվեն քաղաքական խաղերի մեջ: Ըստ տարածված լուրերի՝ գողական աշխարհում երկպառակությունը ուղեկցվել է ծեծով և, որոշ տվյալներով, Զապի, Սուրոյի և Կոբա Ռուսթավսկիի կողմից ևս մեկ երևանցի «օրենքով գողի»՝ 36-ամյա Ժիրայր Բրուտյանի լիազորությունների դադարեցմամբ, ով նույնպես հրաժարվել էր մտնել քաղաքական խաղերի մեջ:

Այլ մանրամասների մասին կխոսենք՝հաջորդիվ:

Տաթեւիկ Աբրահամյան

Լուրեր Հայաստանից