Էքստրասենսի սպանության մեջ կասկածվողը կալանավայրում ռազբորկաների մեջ է

Էքստրասենս Անի Մաջնունյանի սպանության հիմնական կասկածյալ Մուշեղ Մխիթարյանը կալանավայրում խնդիրներ ունի. Այս մասին Fnews.am-ի հետ զրույցում ասաց Մխիթարյանի պաշտպան` Մարինե Ֆարմանյանը:«30 օր տևած հացադուլից հետո Մխիթարը պատմությունների մեջ է ընկել, նա վիճաբանել է այնտեղի աշխատակիցներից մեկի հետ, հայհոյել է, քաշքշուկ է եղել և նրան 10 օրով տեղափոխել են պատժախուց»,,-ասաց պաշտպանը: Նա տեղեկացրեց, որ Մուշեղի առողջական վիճակը այնքան էլ վատ չէ. «Մի փոքր թույլ է իրեն զգում, բայց ամեն  ինչ լավ է, պատժախցում օրը երկու անգամ սնունդ է ստանում, այնտեղ պայմանները այդքան էլ վատը չեն»: Խոսելով գործի ընթացքից պաշտպանը ասաց, որ դռնփակ նիստ է եղել և որոշում է կայացվել, որ Մխիթարի կալանքը երկու ամսով պետք է  երկարաձգեն: «Գործով նոր վկաններ են հարցաքննվել, նոր մանրամանսեր կան, ափսոս նախաքննական գաղտնիք է և հնարավորություն չունենք, այդ ամենը բացահայտելու: Պետք է ասեմ, որ պաշտպանյալս իր մեղքը չի ընդունում և ասում է, որ ինքը մեղավոր չէ»,-ասաց Ֆարմանյանը:

Հիշեցնենք, որ Մուշեղ Մխիթարյանը մեղադրվում է «6-րդ զգայարան» հաղորդաշարի էքստրասենս, 53-ամյա Անի Մաջնունյանի սպանության մեջ: Մուշեղ Մխիթարյանին, մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 8-րդ կետով (սպանություն` զուգորդված ավազակությամբ):