Ե՞րբ կհրապարակվի ՀՀ-ԵՏՄ պայմանագիրը.

«Հրապարակ» թերթը գրում է.«Երեկ Մինսկում ստորագրվել է Հայաստանի ԵՏՄ-ին միանալու մասին համաձայնագիրը: Սերժ Սարգսյանը ոչ այն է՝ խնդրել է, ոչ այն է` հույս է հայտնել, որ Մաքսային եռյակի խորհրդարաններն առաջիկա մեկ-երկու ամսում կվավերացնեն պայմանագիրը, որպեսզի 2015-ի հունվարի 1-ից Հայաստանն էլ մասնակցի ԵՏՄ աշխատանքներին: Թե ԵՏՄ-ում ո՞ւր է աշխատանք ամենավայրի առուծախից բացի, աստված գիտե: Իհարկե, նաև ՌԴ նախագահը, որովհետև նա է միլիարդավոր դոլարներ վճարում Բելառուսի եւ Ղազախստանի անդամակցության դիմաց:

Ի դեպ, երեկ էլ Բելառուսի «հարկային մանյովրի» պահանջը թե շանտաժը կատարելու գնով Պուտինին հաջողվեց հասնել Մինսկի կողմից ԵՏՄ պայմանագրի վավերացման` ներառյալ նախագահի կողմից ստորագրման: Ղազախստանի խորհրդարանի վերին պալատն էլ թեև բոլոր ընթացակարգերը և նախապես հայտարարված ժամկետները մի կողմ թողնելով վավերացրեց համաձայնագիրը, սակայն միևնույն է՝ Նազարբաևը դեռ չստորագրեց, այնպես, որ երկու ամիս հետո, դեկտեմբերին կկայանա ԵՏՄ պայմանագրի վավերագրերի փոխանակումը կողմերի միջև, և միայն դրանից հետո ԵՏՄ պայմանագիրն իրավական ուժ ձեռք կբերի:

Սերժ Սարգսյանի ցանկությունն էլ իբր այն է, որ Հայաստանի ԵՏՄ-ին միանալն էլ դեկտեմբերին իրավական ուժ ստանա: Չէ՞ որ ստորագրելն սկիզբն է, դեռ պետք է ազգային խորհրդարանների վավերացում` բոլոր խութերով ու ոլորաններով: Եթե պայմանագրի ստորագրումը տեւեց ամիսներ, գրեթե մեկ տարի, ինչո՞ւ պետք է վավերացումը նույնքան չտևի, մանավանդ երբ բուն ԵՏՄ պայմանագրի վավերացումը Բելառուսում և Ղազախստանում հինգ ամիս ձգվելով, միևնույն է, երեկ դեռ վավերագրերի փոխանակման փուլին չհասավ:

Սակայն անցած մեկ տարում ԵՏՄ պայմանագրի ստեղծումը, այն քաղաքական բաղադրիչից իսպառ զրկելը, վավերացման ընթացքը կամ այդ դատապարտված կառույցի ապագան չէ կարեւորը, այլ էապես փոխված աշխարհա-քաղաքական իրադրությունն անցած մեկ տարում: Մեկ տարի առաջ ՌԴ նախագահին թվում էր, թե ինքը ԵՄ Արևելյան գործընկերության ծրագիրը կտապալի: Մեկ տարի հետո այդ ծրագիրը Ռուսաստանին կանգնեցրեց տնտեսական տապալման հեռանկարի առջեւ` այն աստիճան, որ երեկ Պուտինը դայլայլում էր, թե ինքը երբեք էլ ԵՄ-ի հետ հակադրման կողմնակից չէ, ընդհակառակը՝ պետք է ԵՄ-ի հետ համագործակցությունը զարգացնել:

Մանրամասները՝ թերթի այսօրվա համարում