Երբեք ոչ մի վուլգար ու ոչ էսթետիկ բան չեմ անի․ Թամարա Գևորգյան

Fnews.am-ի զրուցակիցը դերասանուհի Թամարա Գևորգյանն է։ 2017 թվականի ընթացքում նա հասցրեց կերտել մի շարք կերպարներ։ Նրա համարձակ ու յուրահատուկ ֆոտոշարքերը ակտիվորեն քննարկվեցին համացանցում։

Մեր թղթակցի հետ զրույցում դերասանուհին պատմել է 2017 թվականից ունեցած իր տպավարությունների, ձեռքբերումների մասին, ինչպես նաև խոսել է իր առաջիկա պլանների և անելիքների մասին։

-Թամա՛րա, ինչպիսի՞ն էր Ձեզ համար 2017 թվականը։ Ամփոփելով Ձեր ձեռքբերումները՝ հատկապես որո՞նք կառանձնացնեիք։

- Արդեն մի քանի անգամ նշել եմ՝ 2017 թվականը կորուստների և ձեռքբերումների տարի էր։ Եվ ամենակարևորը՝ մասնագիտական ձեռքբերումներից բացի՝ 2017 թվականն ինձ տվեց այնպիսի մարդկանց, ովքեր ինձ համար արդեն թանկ են։

- Որտե՞ղ և ինչպե՞ս դիմավորեցիք Ամանորը։

- Տանը՝ ընտանիքիս հետ, այնուհետև արդեն աշխատանքի էի։

- Ի՞նչ ակնկալիքներ ունեք՝ 2018-ի հետ կապված։

-Ակնկալիքներ ու պլաններ շատ կան։ Հուսամ՝ դրանք կստացվեն, բայց ամենակարևորն այն է, որ ոչ մի տեսակի կորուստ չլինի։

-Առաջիկայում ի՞նչ նոր կերպարներ եք կերտելու։ Մի փոքր կբացե՞ք փակագծերը։

-Նոր կերպարներ, իհարկե, լինելու են նաև թատրոնի բեմում, սակայն դեռ չեմ կարող խոսել այդ մասին։ Ես գործի մարդ եմ․ կլինի՝ կիմանաք։

-Վերջին ամիսների ընթացքում Ձեր անունն ավելի շատ քննարկվեց ԶԼՄ-ներում ու սոցցանցերում․ պատճառը նաև Ձեր մարմնավորած նոր կերպարներն էին և այսպես ասած՝ համարձակ ֆոտոշարքերը․ մի փոքր խոսե՛ք այդ մասին․ քննադատություններ եղա՞ն Ձեր երկրպագուների կամ հարազատների կողմից։

-Ի զարմանս ինձ՝ չքննադատվեց։ Պատկերացրեք՝ քննադատություններ չեղան, որովհետև ամեն ինչ չափի մեջ էր, իսկ հարազատներս և ընկերներս ինձ վստահում են և գիտեն, որ երբեք վուլգար ու ոչ էսթետիկ ոչ մի բան չեմ անի։ Ամեն բան փորձում եմ անել այնպես, որ արվեստին մոտ լինի։

-Առհասարակ, համարձակ քայլեր անելուց առաջ երկա՞ր եք մտածում, թե՞ միանգամից վարվում եք այնպես, ինչպես ճիշտ եք գտնում։

-Առհասարակ, ես որոշումներս կայացնում եմ պահի տակ ու շատ դեպքերում փոշմանում։ Զարմանալի է, բայց մասնագիտական հարցերի մեջ այդպիսին չեմ․ երկար եմ մտածում և աշխատում։ Իսկ ինչ վերաբերում է համարձակությանս, չեմ բողոքում, հերիքում է։

-Ձեր հարցազրույցներից մեկում մի առիթով նշել եք․ «Պատրաստ եմ բաց տեսարաններում խաղալ, եթե դա ռեժիսորի անձնական կապրիզը չէ», իսկ դժվարությա՞մբ եք խաղում այդ տեսարաններում։

-Երբ դերասանն անցնում է համապատասխան դպրոց, այդ ամենին նայում է որպես մասնագիտություն, հետևաբար, նման դեպքերում ինքդ քեզ հետ խնդիր չես ունենում։ Որպես այդպիսին՝ ես բաց տեսարաններ չեմ ունեցել, բայց, կարծում եմ՝ հեշտ կխաղամ նման տեսարանում, թե դժվար, դա արդեն ավելի շատ կախված է աշխատանքային խմբից ու հատկապես ռեժիսորից։

-Ձեր տոնական բարեմաղթանքը Ամանորի և Սուրբ ծնունդի կապակցությամբ։

-Շնորհավորորում եմ հայ ազգին և, ամենակարևորը, մաղթում եմ, որ այլևս ոչ մի զինվորի կորուստ չունենանք։