Երեւանի տներից մեկում հակատանկային արկ է պայթել. վիրավոր քաղաքացու վիճակը ծանր է

Նոր մանրամասներ են հայտնի դարձել այսօր՝ նոյեմբերի 27-ին, Երեւան քաղաքի Այվազովսկի փողոցի տներից մեկի բակում տեղի ունեցած պայթյունի վերաբերյալ:

Հայաստանի ԱԻՆ-ում, այսօր, ժամը 14:58-ին ահազանգ է ստացվել, որ Երեւան քաղաքի Այվազովսկի փողոցի տներից մեկի բակում հայտնաբերվել է արկ. անհրաժեշտ է փրկարարների օգնությունը:

Միաժամանակ Էրեբունու ոստիկանության բաժնից տեղեկություն է ստացվել, որ նույն հասցեից բեկորային վնասվածքով քաղաքացի է տեղափոխվել Էրեբունի ԲԿ, որի առողջական վիճակը գնահատվել է ծանր:

Դեպքի վայր է մեկնել քաղպաշտպանության վարչության քաղաքացիական պաշտպանության ուժերի հավաքական կենտրոնի ինժեներասակրավորական եւ արտակարգ իրավիճակների արձագանքման խմբերը:

Պարզվել է, որ հայտնաբերվել են հակատանկային արկի բեկորներ (4-5 հատ):

Ժամը 16:30-ին ինժեներասակրավորական խումբը  հակատանկային արկի բեկորները հանձնել է ոստիկանության աշխատակիցներին: