Երեկ մեկ այսօր երկու` մեր քրտինքի հաշվին ստեղծված բյուջեից, պարգև են ստանում

Միշտ ապրել, աշխատել, ստեղծել և պայքարել ենք մեր հայրենիքում խաղաղ, ապահովված, զարգացած պետություն ունենալու համար։ Ցավոք ԽՍՀՄ֊ի փլուզումից հետո, կարծես թե այն ունեինք, սակայն իշխանության եկած ժողովրդի ընտրյալները, ինչպիսին չի եղել Հայոց պատմության մեջ, մինչ ազգի նվիրյալները պայքարում էին մեր պետականության, անկախության, ազատության ու խաղաղության համար, ընտրյալները մաս մաս բաժան բաժան էին անում իրենց մեջ մեր ծնողների աշխատանքի ու քրտնքի հաշվին ստեղծված պետական ունեցվածքը և ,,պարգևատրում,, իրենց չաշխատածի դիմաց։ Եղավ 2016֊ի ապրիլ, նույն պարգևատրվածների շնորհիվ ունեցանք Ապրիլյան պատերազմ, որի հետևանքները մինչև հիմա շարունակվում են՝զոհեր ու զոհեր։ Ժողովուրդը այլևս չուներ համբերելու և դիմանալու տեղ և ոտքի կանգնեցինք, առաջնորդ ընտրեցինք Նիկոլ Փաշինյանին, թիկունք և սատար եղանք և ազատվեցինք այն եռագլխանի դևից, որը 30 տարի ավիրել, քանդել էր երկիրը, կերել 18֊20 տարեկան տղաների կյանքեր, զրկել իր ժողովրդին ապրելու հնարավորությունից։ Մայիս ամիսը ժողովրդիս համար հաղթանակների ամիս է եղել, այն չբացառեց նաև 2018֊ը։ Ժողովուրդը հաղթեց և ընտրեց իր իշխանությունը, սակայն բազում բայցեր։ Արդեն գնում ենք դեպի 10֊րդ ամիսը ու ժողովրդի կյանքում դեռ ոչմի բարելավում չի նկատվում։ Երբ այս մասին բարձրաձայնում ես ասում են, համբերեք դեռ նոր են աշխատում, համբերեք կաշխատեն, կտեսնեք, լավատես եղեք։ Լավատես եմ, հատկապես, որ Ազգային ժողովում կան նաև նվիրյալ ընկերներ, որոնց տարիներ գիտեմ, որոնց հավատում և վստահում եմ։ Սակայն ուզում եմ հասկանալ, եթե դեռ չեն հասցրել աշխատել, հատկապես, որ բոլոր մարզպետները երկու ամսվա աշխատողներ են, պարգևատրվուն են, այն էլ 104% ֊ով։ Բա մենք 40 տարի է աշխատում ենք մեր երկրի
համար, զավակներ ենք ունեցել, կրկին հայրենիքի նվիրյալներ, չիմացանք այդ պարգևը որն է։ Երեկ մեկ այսօր երկու մեր քրտինքի հաշվին ստեղծված բյուջեից պարգև են ստանում։ Միգուցե արժանի են, արված գործը թող ներկայացնեն։ Ինչքան մարզ կա, բոլոր տեղերից, բնակիչներից նամակներ եմ ստանում իրենց անլուծելի խնդիրների, անտարբեր ղեկավարների և Ճարահատված հայրենիքը լքելու մասին։
Կարծում եմ բոլորիս մոտ առաջացած անհանգստությունների պատասխանները պետք է ստանանք։ Իսկական Թումանյանի Շունն ու կատվի օրն ենք ընկել։ Ձեռք բերած վստահությունը պետք է շատ ամուր և զգույշ պահպանվի և խնայվի։

ՄԱՆՈՒՇԱԿ ՍՏԵՓԱՆՅԱՆ